“Mallkimi i fukarenjve” është premiera e re për këtë sezon në Teatrin Kombëtar. “Mallkimi i fukarenjve” është drama e një familjeje amerikane , të cilët luftojnë për mbijetesë. Ajo vjen në shqip me regji të Kastriot Çipit, në skenë do të ngjiten aktorë si Yllka Mujo e Artan Imami.
Shfaqja, e cila do të presë publikun në datat 16-17 prill, përmban nuditet të pjesshëm, fjalor të papërshtatshëm dhe skena dhune, duke e kufizuar kështu audiencën mbi moshën 14–vjeçare.
“Mallkimi i fukarenjve” është një dramë me tri akte, që rrëfen historinë e një familjeje disfunksionale që jeton në një fermë e ndërsa rropaten për kontrollin e fermës së rrënuar të familjes në një kërkim të kotë për liri, siguri dhe një kuptim në jetët e tyre.
Në tri aktet përshkruhet sesi anëtarët e një familjeje luftojnë për shkak të mallkimit të fukarenjve. Familja ndikohet nga një mallkim, por Shepard nuk e specifikon se ç‘mallkim është. Drama gjithashtu përfaqëson sesi lufton burri postmodern për të gjetur vendin e tij brenda familjes. Megjithatë në një familje të shkatërruar shpëtimi është i pamundur. Familja Tejt është një familje e shtresës së ulët të mesme në Kaliforninë rurale, në përpjekje për të mbajtur lidhjen familjare dhe jetesën tradicionale.
Në këtë dramë, dramaturgu Sam Shepard balancon komedinë e zezë dhe satirën ngacmuese në pamjen e një familjeje për të mbajtur frymën gjallë.
Sam Shepard është një nga figurat kryesore të dramaturgjisë postmoderne amerikane. Në pjesën më të madhe të dramave të tij, fokusohet në përshkrimin e karakterit të burrit amerikan dhe betejat që përballet për të gjetur identitetin e tij mashkullor. Në Mallkimi i fukarenjve, ai paraqet luftën e burrit amerikan brenda familjes. Mallkimi i Fukarenjve është konsideruar si e para e një serie në tragjeditë në familje. Disa kritikë e kanë konsideruar si pjesë e një kuinteti që përfshin “Të marrë për dashuri” ( 1983), dhe “ Një gënjeshtër e mendjes”. ( 1985). Premierën e parë kjo dramë e pati më 2 mars të vitit 1978.
