Gjykata e Apelit të Posaçëm nuk ndryshoi masat e sigurisë për dy nga ish-drejtorët e Bashkisë së Tiranës, të akuzuar për dosjen “5 D”.
Redi Molla dhe Mariglen Qato do të mbeten përsëri në qeli, teksa Gjykata e Lartë i kishte kërkuar shkallës së dytë të rishqyrtonte masën që kishte dhënë në muajin Maj të këtij viti, ku kishte lënë në fuqi shkallën e parë të GJKKO.
Por edhe pas rishqyrtimit, mbeti në fuqi e njëjta masë.
Në vendimin e marrë ditën e sotme (7 Nëntor) bëhet me dije se Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtare Nertina Kosova, u shpreh për çështjen me nr. 58 akti, të datës 11 Nëntor, me kërkesë të avokatëve të të dyshuarve që qëndrojnë prej gati një viti në paraburgim.
Kjo çështje regjistrimi, ishte e kthyer për rishqyrtim me një tjetër trup gjykues nga Gjykata e Lartë, pas prishjes së vendimit nr. 18, të datës 3 Maj 2024 të Gjykatës së Posaçme të Apelit për Korrupsionin dhe Krimin e Organizuar, për personat nën hetim Redi Molla dhe Mariglen Qato.
Në fund të njoftimit të gjykatës, theksohet se u vendos për: “Miratimin e vendimeve nr. 28, datë 28.03.2024 dhe nr. 35, datë 30.03.2024 të Gjykatës së Posaçme të Shkallës së Parë për Korrupsionin dhe Krimin e Organizuar, për dy personat nën hetim Mariglen Qato dhe Redi Molla”.
Pra janë lënë në fuqi masat e “arrest me burg”për dy ish-bashkëpunëtorët e Erion Veliajt, të cilët akuzohen për shpërdorim detyre.
Vetë kryebashkiaku Veliaj, pavarësisht indiceve dhe provave si i përfshirë në aferë, ndaj tij nuk është ngritur asnjë akuzë penale.
Sipas SPAK, dy drejtorët e Erion Veliajt, Redi Molla dhe Mariglen Qato, si drejtues të Ujësjellësit, i kanë dhënë tendera një kompanie që de facto ishte në pronësi të tyre. Kontrata të tjera kanë marrë dhe nga vetë institucioni i drejtuar nga Erion Veliaj, si dhe ente të tjera në varësi të Bashkisë Tiranë, duke përdorur pushtetin e tyre si të zgjedhurit e Veliajt. Vlerësohet se paratë e përfituara nga procedurat tenderuese i kalojnë 30 milionë euro. Kompania e drejtorëve të Veliajt ka përfituar nga bashkia Tiranë disa leje ndërtimi. Po ashtu, rezulton e lidhur me një hotel në Durrës që ka marrë nga qeveria “statusin special” që konsiston në falje të taksave. Një komunikim konfidencial i një punonjëseje të firmës së Mollës e Qatos sugjeron se bosi i vërtetë i hotelit në Durrës dhe kompanisë “5 D” që thithte paratë e taksapaguesve është vetë shefi i bashkisë, Erion Veliaj.
Opozita ndërkohë, që proteston në mënyrë periodike para bashkisë së Tiranës, e cilëson kryebashkiakun “kokën e bandës së drejtorëve hajdutë”.
