Shoqëria Civile protestoi sot para Kryesisë së Kuvendit në mbështetje të drejtësisë, ndërsa kërkoi që Kuvendi t’i heqë imunitetin Belinda Ballukut dhe ajo të vihet në dispozicion të drejtësisë.
Migen Qiraxhi nga Qëndresa Qytetare tha se ministrat apo deputetët kanë nga 300 apartamente, duke iu referua Belinda Ballukut.
Ndërsa në mënyrë simbolike ata hodhën në tokë disa çelësa shtëpish duke thënë se “këto janë çelësat e banesave të shqiptarëve”.
“Shqipëria nuk është më shtëpia e shqiptarëve. Kudo ku shkojnë shqiptarët mund të blejnë në Shqipëri. Deputetet e këtij Kuvendi, ministrat, nuk kanë një apo dy, por kanë 100-200-300 apartamente. Qytetarët duhet të vijnë ti kërkojnë apartamentet në këtë vend. Ky është vendi ku janë çelësat e shtëpive të shqiptarëve”, tha Migen Qiraxhi.
“300 çelësa këtu i kanë, cdo njeri të vijë të marrë nga një apartament të Belindës”, tha aktivisti Andi Tepelena.
“Ne kishim thirrur një protestë qytetare, ndërsa dje na u njoftua se ishte shtyrë për 12 dhe më pas u shty fare. Rama ka frikë që të përballët me drejtësinë dhe gjen këto artifica dhe shtyn procesin. Këta politikanë të veshur me pushtet, po zvarrisin procedurën siç ndodhi me Xhaçkën. Duan të kalojnë afatin që të mbushen 3 muaj. Qytetarët duhet të bëjnë presion që të mos lihet me kaq kjo çështje. Edi Rama po bën çmos, duke përdorur dhe lobimet ndërkombëtare, por po dështon çdo ditë. Të shohësh punët publike ku shemben tunelet me vlerë mln euro, ashtu po shembet dhe retorika e tij. Ai është i dështuar, pasi i ka dështuar modeli i tij ekonomiko-social, pasi shqiptarët po ikin. Gjysma e buxhetit vidhet, ndihmat e BE janë bllokuyar, 75% e studentëve duan të ikin, ky është shpopullim, gjenocid që po i bëhet shqiptarëve. Mos të pengohet nga Ballët, nga Cuçot e Çomot. Ne duam që Balluku dhe këta zyrtarë të korruptuar të vihen para drejtësisë. Duam që të jetë një proces i hapur dhe transparent për qytetarët.”, shtoi Qiraxhi.
