Në raportimin e përvitshëm “Doing Business” në listën e 190 ekonomive të botës të analizuar nga Banka Botërore, Shqipëria renditej 19 vende më poshtë se një vit më parë.
Në lidhje me këtë fakt, ka reaguar ministrja e Financave dhe Ekonomisë Anila Denaj e cila shprehet se ulja nuk është vetëm për Shqipërinë por edhe në disa vende të tjera të rajonit.
Duke u ndalur tek vendi jonë, ajo tha se ulja në renditje ka të bëjë me disa ndryshime metodologjike.
“Është e vërtet që sot kemi një ulje të renditjes me 20 vënde e cila po të shikohet edhe në disa vënde të tjera të rajonit nuk është se ka qënë shumë optimiste. Kjo nuk na heq absolutisht leximin me vëmendje në raportin doing business dhe në mënyrë absolute kalimi indicator për indicator mënyra më e mirë për ta lexuar. Ndryshimi i metodologjisë sidomos në dy aspekte të cilët japin një peshë më të madhe element të cilët për vende të tjera të ekonomisë më të vogla si Shqipëria sigurisht krijon ndryshim në renditje por nuk mund të themi se ka regres dhe nuk është bërë asnjë përpjekje dhe reforma, ato janë në proces dhe ato finalizohen në të gjithë komponentët si në aspektin e implementimit të sistemeve IT ashtu dhe të procedurave”, u shpreh Denaj.
Më tej, ministrja e Financave dhe Ekonomisë jep një tjetër argument për raportin e të bërit biznes, që sipas lidhet me lejet e ndërtimit dhe me rritjen e taksës në infrastrukturë nga pushteti vendor.
“Indikator në rënie me impakt negativ është marrja e lejes së ndërtimit, ku metodologjia e ndryshuar nuk konsideron si prioritare faktin që Shqipëria zbaton një proces online të marrjes së lejes së ndërtimit dhe shkurtim efektiv të kohës në marrjen e lejes. Por pesha më e madhe në këtë indikator i është dhënë rritjes së kostos si pasojë e rritjes së taksës në infrastrukturë për pushtetin vendor. Ky ndryshim ndikon”, shtoi Denaj.
