Pika kufitare e Zogaj-Skejë që do të lidhë Shkodrën me zonën e Krajës, po mbetet peng i rrugës së premtuar nga qeveria shqiptare. Ndërtimi i 9.3 km rrugë, ku 6.3 km i takojnë qeverisë shqiptare nuk ka ende asnjë angazhim nga kjo e fundit, pavarësisht se Mali i Zi e përfundoi riparimin e rrugës.
Rehabilitimi i rrugës dhe hapja e pikës së re kufitare do t’i shërbejë jo vetëm banorëve të zonës, por do gjenerojë një numër të lartë turistësh.
Abc u interesua në bashkinë e Shkodrës. Drejtori i urbanistikës, Aljon Koçkiqi tha se projekti është gati. Fillimi i punimeve i takon FSHZH.
“Projekti është realizuar nga bashkia, FSHZH ka përfunduar procedurat për tenderin. Bashkia ka dhënë lejet e ndërtimit pjesa tjetër i mbetet FSHZH”, thotë Koçkiqi.
“Projekti ka një peisazh artistik të rrugës, gjerësia 10.5 metër me gjithë një korsi bicikletash dhe dy korsi kalimi. Ka një trotuar 3 metër për këmbësorët. Trotuari do jetë me ngjyrë që të dallohet”, shton ai.
Abc i kërkoi Fondit Shqiptar të Zhvillimit informacion se kur do të nisin punimet, por nuk morëm përgjigje.
Në korrik të 2018-es në mbledhjen e përbashkët mes Qeverisë Shqiptare dhe asaj të Malit të Zi mbajtur në Shkodër u nënshkruan disa marrëveshje, me të cilave dhe hapja e një pike kufitare në Zogaj-Skejë që do lidhë Shkodrën me zonën e Krajës.
