Sali Berisha thotë se Partia Demokratike krahas punës që po bën për zgjedhjet brenda në parti, është duke punuar paralelisht dhe për zgjedhjet lokale që pritet të mbahen pranverën e ardhshme. Gara mes partive është e fokusuar në kryeqytet, teksa në dhjetorin e kaluar, u përgatitën për një betejë me kandidatë “emergjentë”.
PD në zgjedhjet e parakohshme për Tiranës që nuk arritën të zhvilloheshin, përkrahën Florian Binajn, një emër i trumbetuar nga të gjitha partitë opozitare si zgjedhje e përbashkët dhe e paanshme. Nisur nga deklaratat e fundit të Berishës, duket se emri i Binajt tashmë është fshirë nga lista për Tiranës, ndërsa kreu i PD thotë se “do të bëjmë gjithçka për kandidaturat më të mira”.
“Opozita ka filluar punën dhe së shpejti përfundon procesin e analizës dhe zgjedhjeve brenda partisë. Ndërkohë që po mendohet, po punohet edhe për zgjedhjet lokale.
Pra nuk do jenë dy muaj përpara, ju siguroj do të jenë shumë më herët se zgjedhjet e fundit dhe ne do të bëjmë gjithçka për kandidaturat më të mira”, tha Berisha në një bashkëbisedim me qytetarët.
Nuk dihet nëse nga PS do të ketë një lëvizje të Ogerta Manastirliut, ndonëse kjo e fundit mban fjalën hapëse në çdo takim të organizuar së fundmi nga PS në qarkun e Tiranës. Përveç saj, dëshirën për kandidim e ka shprehur dhe Erion Braçe, të cilin Berisha e cilëson si “përfaqësues i një partie që është zhdukur pa nam e nishan”.
“Ai është, ose mbahet si socialisti, si një përfaqësues i një partie që është zhdukur pa nam e nishan. Por nuk është zhdukur, por ka marrë trajtën e re, sepse kjo parti lindi në krim.
Ndaj dhe më mirë të mos komentoj për problemet e tyre. PD do tu ofrojnë qytetarëve të Tiranës, kandidaturën më të shkëlqyer, do të bëjë gjithçka një front më të gjerë me të gjithë opozitën”, tha Berisha.
Sakaq, Berisha vijon të jetë i bindur se me Edi Ramën si kryeministër, Shqipëria nuk do të anëtarësohet në Bashkimin Evropian. Ai thotë se PD është pro anëtarësimit në BE, ndërsa shton se sot Shqipëria nuk përmbush asnjë kriter përveç atij gjeostrategjik.
“Edi Rama këto ditë, duke mashtruar shqiptarët dhe duke mos u treguar të vërtetën, thotë nëpër takimet me socialistët se janë ata të paudhët që po përpiqen të pengojnë këtë proces. Edhe njëherë dua të them para shqiptarëve: qëndrimi ynë është shumë transparent, ne jemi për procesin e integrimit, por deklarojmë se Shqipëria nuk plotëson absolutisht asnjë kriter përveç kriterit gjeostrategjik.
Siç e shihni ju, koha po vërteton këtë që kemi thënë. Ne e kemi thënë këtë me kohë, ne kemi paraqitur para komunitetit ndërkombëtar dokumente dhe fakte të pakundërshtueshme se, Shqipëria nuk plotëson asnjë kriter. Me Edi Ramën, integrim nuk ka”, tha Berisha.
gijotina.com/
