Në Kukës është zhvilluar sot ceremonia mortore për 31-vjeçarin Visart Cengu që u vra me armë zjarri nga Dibran Hoxhaj në lokalin në pronësi të tij në Prizren, “Kobra City” pas një sherri për faturën prej 400 eurosh që ai dhe miqtë e tij refuzuan ta paguanin.
Ndërkohë që Hoxhaj dhe 5 bashkëpunëtorët e tij u lanë sot në burg nga Gjykata e Prizrenit, familjarët e 31-vjeçarit hapën dyert e mortit.
Një i afërm i vikimtës ka publikuar fotografi nga ceremonia mortore e të riut që kishte ardhur nga Franca për festat e fundvitit.
Ai ka shpërndarë edhe fjalën e babait të viktimës.
“Ne kishim një armik të përbashkët, Serbinë, të cilës bashkërisht ia drejtuam pushkën dhe kurrë nuk besoja se kemi plumba për shqiptarë”, citohet të ketë thënë Behar Cengu.
Postimi i plotë i te afërmit të Cengut:
Sot në varrezat e qytetit në Kukës i dhamë lamtumirën e fundit të riut Visart (Behar) Cengu, 31 vjeçar, i cili u vra në makinë duke u larguar nga një lokal në dalje të Prizrenit.
Mijëra qytetarë kuksianë dhe miq të familjes Cengu nga Kosova kishin ardhë për ta përcjellë në banesën e fundit këtë të ri i cili kishte ardhur nga Franca për ta kaluar ndërrimin e moteve në vendlindje.
Kjo vrasje është përjetuar rëndë jo vetëm nga familjarët por edhe nga të gjithë kuksianët dhe miqtë e shumtë të familjes Cengu nga Kosova e mërgata.
“Ne kishim një armik të përbashkët, Serbinë, të cilës bashkërisht ia drejtuam pushkën dhe kurrë nuk besoja se kemi plumba për shqiptarë” u shpreh i ati i Visartit i cili bashkë me vëllëzërit e tij i kishte kontribuar luftës së UÇK-së për çlirimin e Kosovës!
I lehtë i qoftë dheu Visartit e familjarëve Zoti iu dhëntë forcë për ta përballuar këtë dhimbje. Qoftë kjo vrasja e fundit në mes të shqiptarëve!
