Partia Demokratike iu ka qëndruar akuzave të bëra gjatë ditës së djeshme në drejtim të djalit të ministrit të brendshëm Bledi Çuçi, që sipas tyre është arrestuar për trafik barnash në Itali.
Në një deklaratë për mediat, sekretari i Përgjithshëm i PD, Flamur Noka kërkon që ministrit të japë dorëheqjen nga detyra ndërsa shton se kryeministri Edi Rama e ka marrë në mbrojtën ashtu siç bëri dhe me ish ministrat Saimir Tahri dhe Fatmir Xhafaj për të mbajtur të fshehtë skandalin.
Sipas Nokës, Endi Çuçi, djali i ministrit është i pari në listën e personave që kanë mashtruar me falsifikimin e dokumenteve mjekësore për të hyrë në mënyrë të paligjshme në Itali dhe për të mashtruar sistemin shëndetësor Italian.
Noka shton se djali i Ministrit të Brendshëm përmendet në cilësinë e personit që ka transportuar ilaçet në Shqipëri për llogari të kreut të skemës kriminale dhe po sipas PD rrezikon deri në 12 vite burg.
“Edi Rama njësoj siç mbrojti Saimir Tahirin të përfshirë në trafik droge, njësoj siç mbrojti Fatmir Xhafën për të vëllanë trafikant droge, njësoj siç mbrojti kryebashkiakë e deputetë – trafikantë e shkelës të tjerë të ligjit, po bën gjithçka për të mbajtur të fshehur skandalin e përfshirjes së djalit të Bledi Çuçit në një aferë kriminale trafiku në Itali dhe ta mbajë atë Ministër të Brendshëm. Nëse në Shqipëri do kishte shtet me demokraci funksionale dhe jo regjim, Bledi Çuçi edhe nëse s’do të jepte dorëheqjen, do duhet të ishte shkarkuar menjëherë. Bledi Çuçi ka heshtur për rolin e të birit në skemën e trafikut, të zbuluar nga autoritetet ligjzbatuese italiane, por heshtja e tij e qëllimshme nuk i mbulon dot faktet e rënda. Në faqen 4 të hetimeve, Endi Çuçi është i pari në listën e personave që kanë mashtruar me falsifikimin e dokumenteve mjekësore për të hyrë në mënyrë të paligjshme në Itali dhe për të mashtruar sistemin shëndetësor Italian; Në faqen 9 të hetimeve paraprake, djali i Ministrit të Brendshëm të Shqipërisë përmendet në cilësinë e personit që ka transportuar ilaçet në Shqipëri për llogari të kreut të skemës kriminale. Mbi djalin e Bledi Çuçit bie akuza e “përdorimit të parave, mallrave ose përfitimeve të tjera që rrjedhin nga një krim; në veprimtari ekonomike ose financiare” sipas nenit 648 të Kodit Penal të Republikës së Italisë. Kjo vepër dënohet nga gjobë deri 25 mijë euro deri në 12 vjet burg; Djali i Ministrit të Brendshëm përmendet edhe në pjesë të tjera të fashikullit hetimor, ku është konsoliduar ideja e hetuesve për rolin e tij të transportuesit të ilaçeve në mënyrë të paligjshme”, shprehet ndër në tjera Noka.
