Në ditën e 10-të të bllokimit të Koridorit VIII, vijon puna me kapacitet të plotë natën dhe ditën, për të bërë të mundur sërish aksesueshmërinë e një prej akseve rrugore më të rëndësishme në vend.
Ka përfunduar devijimi i lumit Shkumbin në të majtën e tij dhe tashmë ka nisur sistemimi i terrenit nga ku do të kalojë bypass-i provizor 1.3 km që do të rikthejë lëvizjen.
Pas lehtësimit të shpatit të malit, janë vendosur dy sonda gjatë ditës së shtunë dhe dy sonda të tjera po vendosen sot që do ta bëjnë të mundur studimin gjeologjik.
Projektuesi ka bërë gati tashmë 3 projekt-propozime dhe mëngjesin e së hënës grupi teknik do vendosë përzgjedhjen e njërës prej tyre.
Sipas projektit të përzgjedhur përcaktohen edhe afatet e zbatimit dhe për pasojë pasditja e së hënës do ketë edhe një parashikim për hapjen e qarkullimit në Koridorin VIII.
gijotina.com/
