Pianistja shqiptare e skenave ndërkombëtare, një histori suksesi që nis në sallat e ftohta të Akademisë së Arteve për të kulmuar në skenat më të famshme të Botës
Nga Loneta Progni
“Në sallën e Akademisë bënte shumë ftohtë dhe i madhi Ferdinand Deda më solli një palë doreza që të më ngroheshin duart. I kam ende ato doreza dhe i ruaj si kujtim, sepse për mua ai ishte dirigjenti i zemrës. Pata fatin të punoja në shumë koncerte me të, edhe më vonë”, tregon e emocionuar pianistja e suksesshme e skenave ndërkombëtare Dhurata Lazo. Ky është një moment i veçantë nga koncerti i saj i parë me orkestrën simfonike të RTSH-së, me dirigjentin e njohur Ferdinand Deda. Në atë kohë Lazo ishte vetëm 16-vjeç, por edhe pas kaq shumë vitesh, ajo sërish e rrëfen me shumë emocion dhe nostalgji për 27.al .
Pianistja e njohur Dhurata Lazo, ka lindur në Gjirokastër dhe në moshën 6-vjeçare ka marrë mësimet e para për pianoforte, në qytetin e lindjes. Megjithëse e gjendur para një instrumenti mistik dhe me përmasa të mëdha, e vogla Dhurata, në atë kohë la lojërat e zakonshme të fëmijërisë për t’iu përkushtuar ëndërrës së saj të madhe. Talenti i padiskutueshëm i pianistes do të jepte frytet e para në skena të vogla dhe modeste, por kurrsesi nuk mund të kalonte pa u vënë re nga artistët e kohës. Dhurata ka marrë pjesë në disa konkurse të zhvilluara në RTSH, ku është vlerësuar me çmime të ndryshme. Në moshën 14-vjeçare, ajo fitoi konkursin për të vazhduar studimet pianistike në Liceun Artistik “Jordan Misja” nën drejtimin e pedagoges Nikoleta Nako.
Është diplomuar për pianoforte në Konservatorin e Tiranës në vitin 1990, me profesor Anita Tartari dhe në shtator të po këtij viti transferohet në Itali, ku diplomohet në vitin 1998 edhe në Konservatorin “Giuseppe Verdi” të Milanos. Ka studiuar për shumë vite në Akademinë e Chopin-it në Padova me profesorin polak Marian Mika dhe ka qenë e vlerësuar nga Fazioli Piano, si dhe e ftuar për recitale në premierat e tij. Lazo ka luajtur recitale pianistike në Itali, Gjermani, SHBA, Luxemburg, Francë, Zvicër, Austri, Ukrainë, Shqipëri, Kosovë, Poloni dhe gjetkë.
Në koncertet që ka zhvilluar në Itali, ka luajtur vepra shqiptare, si “ Delja rude” apo pjesë të kompozuara nga Çesk Zadeja, të vlerësuara shumë nga kritika italiane.
“Madje CD-të me perlat shqiptare ua kam dhuruar në Romë Atit të Shenjtë dhe Mbretëreshës së Anglisë në Londër”, tregon me shumë krenari pianistja.
Dhurata Lazo është nderuar me një sërë çmimesh ndërkombëtare. Të gjitha këto arritje, Dhurata ua dedikon njerëzve të dashur që me dashuri ia kanë lehtësuar shumë rrugën drejt karrierës dhe suksesit.
https://www.facebook.com/dhuratalazo/videos/10202634893791268/
