Besmir Dervishi është emëruar në postin e zëvendësdrejtorit të Policisë së Tiranës, duke zëvendësuar Erion Ismailin, i cili aktualisht është nën hetim. Emërimi i tij është miratuar nga Ministria e Brendshme dhe është firmosur nga drejtori i komanduar i Policisë së Shtetit, Sokol Bizhga.
Dervishi ka një karrierë të mëparshme në strukturat e policisë në kryeqytet, ku ka shërbyer si shef i Seksionit për Hetimin e Krimeve ndaj Pronës në Drejtorinë Vendore të Policisë Tiranë, si dhe ka drejtuar Komisariatin Nr. 3 dhe Komisariatin Nr. 5. Emri i tij është shoqëruar shpesh me debate publike. Ndër incidentet më të njohura është përfshirja e tij në përplasje me deputetë dhe me gazetarin Alfred Lela gjatë aksionit për prishjen e Teatrit Kombëtar.
Në media janë publikuar shqetësime lidhur me etikën e tij profesionale dhe sjelljen e tij në jetën private, si dhe janë ngritur pikëpyetje për të kaluarën e tij ku dyshohet se mund të jetë me precendent të mëparshëm penal. Ky emërim ndodh, pas shkarkimit të ish-drejtorit Ilir Proda dhe pezullimit të disa zyrtarëve të tjerë për menaxhimin e protestave.
gijotina.com/
