Lulzim Toçi, 30 vjeç, është shqiptari që vrau bashkëshorten Eleonora Toçi, në Itali. Siç raportojnë mediat italiane, ngjarja ndodhi orët e para të kësaj të mërkure në komunën San Felice a Cancello, në provincën e Caserta-s. Aty, çifti jetonte në një apartament bashkë me dy fëmijët e mitur 4 dhe 6 vjeç.
Sipas rindërtimit paraprak të ngjarjes, e reja është mbytur me duar nga bashkëshorti, gjatë një grindjeje mes të dyve. Dhe ngjarja, sipas asaj që raportohet nga mediat italiane, ka ndodhur në sy të fëmijëve.
Si autori, ashtu dhe viktima nuk kishin precedentë të mëparshëm penale.
Pas krimit, raportohet se 30-vjeçari ka shkuar në shtëpinë e kunatës dhe i ka thënë ta shoqëronte për në spital. Kjo e fundit është treguar skeptike dhe ka telefonuar në banesë fëmijët. “Babi vrau mamin”, i kanë thënë fëmijët tezes, e cila ka kontaktuar menjëherë policinë.
Raportohet se 30-vjeçari, punëtor në bujqësi, ishte në gjendje konfuze para banesës, kur karabinierët mësynë rreth orës 5:00 në apartament. Aty u gjet trupi i pajetë i amvisës 24-vjeçares Eleonora Toçi, si dhe dy fëmijët e çift.
Lulzim Toçi është shoqëruar nga policia, ndërsa hetimet vijojnë për zbardhjen e rrethanave të ngjarjes. Ndaj tij është ngritur akuza për vrasje të rëndë me dashje.
Fëmijët ndërkohë janë marrë nën përkujdese nga shërbimet sociale lokale.
