Ish-zyrtarja e lartë e qeverisë Alda Klosi nuk zotëron vetëm koleksionin e florinjve që i vodhi pastruesja Rozeta Dobi bashkë me djalin e saj, Havier Dobi, por kishte ‘fiksim’ dhe diamantet.
TPZ shkruan se zyrtarja e lartë e qeverisë, kur ishte drejtoreshë në Drejtorinë e Koncesioneve në Ministrinë e Financave dhe Ekonomisë që drejtohej nga Arben Ahmetaj, është marrë me anën financiare të negocimit me disa kompani turke për koncesionin e qeverisë shqiptare për ndërtimin e aeroportit të Vlorës.
Për rrjedhojë, sipas të njëjtit burim, në kuadër të negociatave, Klosi ka udhëtuar drej Turqisë dhe gjithmonë blinte nga 2-3 sete stolish me diamante në një fabrikë në periferi të Stambollit, duke qenë se kishte privilegjin të kalonte pa kontrolle doganore në aeroportin e Stambollit dhe në atë të Rinasit. Nuk dihet se ku mund t’i ketë fshehur zonja Klosi këto stoli me diamante, duke qenë se në banesën ku jetonte me qira, e cila dhe u vodh nga pastruesja e djali i saj, nuk u gjetën.
Vetëm pak ditë më parë u zbulua një megavjedhje ku Rozeta Dobi, pastruese bashkë me të birin, Havierin vunë në shënjestër dhe vodhën mbi 540 mijë euro, plus një sasi të konsiderueshme florinjsh dhe sendesh me vlerë. Banesa që solli zbulimin e dyshes ishte ajo e këshilltares në Kryeministri, Alda Klosi, njëherazi ish-shefe e Kabinetit të ish-ministrit të Rindërtimit, Arben Ahmetaj. Ata vodhën te shtëpia e Klosit 120 mijë euro lekë dhe florinj. Por kjo vjedhje ka shërbyer si një shkëndijë për një tjetër çështje. Atë të burimit të parave të vjedhura. Në dëshminë e saj për mediat, Klosi thotë se paratë i kishte mbledhur për kurimin e xhaxhait ndërsa për to nuk ka asnjë faturë.
