Ka dështuar raundi i tretë për zgjedhjen e presidentit pasi në kryesinë e Kuvendi nuk u depozitua asnjë kandidaturë për zgjedhjen e kreut të ri të shtetit. Komisioni i Ligjeve miratoi raportin që do t’i depozitohet Kuvendit, pa një kandidaturë.
Kryetarja e Komisionit, Klotilda Bushka dha njoftimin formal sa i takon mungesës së kandidaturave të paraqitura për postin e Presidentit të Republikës, duke deklaruar se edhe raundi i tretë konsiderohej tashmë i mbyllur.
“Besoj se jeni në dijeni, siç na kanë njoftuar edhe shërbimet e kuvendit, edhe në këtë raunde nuk është paraqitur asnjë kandidaturë kështu që edhe ky raund konsiderohet i ezauruar”, u shpreh Bushka.
Mbledhja e komisionit zgjati vetëm pak minuta, ndërsa deputeti socialist Eduard Ndreca lexoi raportin. Edhe në këtë raund palët politikë nuk kanë paraqitur asnjë kandidat për ta çuar për votim.
