Kreu i Grupi Parlamentar të Partisë Demokratike, Enkelejd Alibeaj, deklaroi se PD mori pjesë në procesin për zgjedhjen e presidentit në emër të detyrimit që kishte ndaj popullit shqiptar, por nuk u bë pjesë e kësaj farse në momentin që PS theu rregullat e propozuara prej tyre.
Alibeaj theksoi pas dështimit të raundit të tretë, se ai nuk ndihet as i penduar apo i tallur që mori pjesë në një proces për t’i dhënë shqiptarëve një president të të gjithëve dhe mbi palët.
“Unë besoj se dokumenti ynë është i qartë, se nëse do tërhiqeshin nga këta rregulla ne do të hiqnim dorë pasi nuk mund të bëheshim pjesë e një farse. Grupi parlamentar ka mbajtur një qëndrim të qartë, qëndroi i sinqertë përballë një procesi serioz. Jo as i penduar, i tallur jo e jo, pasi nuk besoj se mund të ketë dinjitet Balla Rama apo ndonjë nga këta të ketë mundësi të tallet. Zgjedhja e Presidentit të Republikës kërkon një proces serioz. Morëm pjesë në proces për të mosvazhduar me historinë e bojkotit. S’marrim pjesë atje, s’marrim pjesë këtu se këta janë hajdut, po hajdut janë e dimë. Ama detyrimin nuk e kishim ndaj këtyre, e dinim që ata mund ti hanin fjalët, por e kishim detyrim ndaj popullit shqiptar”, tha Alibeaj.
