Ish-kryetarja e Komisionit Hetimor për Inceneratorët, Jorida Tabaku ka reaguar në lidhje me aferën e inceneratorit të Fierit dhe arrestimin e ish-deputetit socialist Alqi Bllako.
Përmes një mesazhi në “Facebook”, Tabaku thekson se e gjithë kjo lojë që u vazhdua nga Lefter Koka dhe Alqi Bllako kishte “ortak” në këtë skemë edhe kryebashkiakun e Fierit Armando Subashi, që sipas saj sot është jashtë hekurave.
“E gjithë kjo lojë që u vazhdua nga Lefter Koka dhe Alqi Bllako kishte dhe “ortak” në këtë skemë edhe kryebashkiakun e Fierit Armando Subashi që sot çuditërisht qëndron jashtë. Letërkëmbimi mes Bllakos-Kokës dhe Subashit është një provë e qartë e përgjegjësisë penale të këtij të fundit që sot nuk po ndëshkohet siç edhe ligji kërkon. Shndërrimi i tokës “Arrë” në një tokë “truall” është një përgjegjësi sa e Bllakos aq edhe Subashit. Madje ky i fundit ka një përgjegjësi më të lartë si pasojë e pagesave që ka kryer nga buxheti i bashkisë Fier. Arrestimi i Bllakos për çështjen e tokës në Fier dhe padyshim edhe për procedurat korruptive të tenderit të Inceneratorit të Fierit nuk mund të jetë e vetme sepse të gjithë e kanë të qartë që në këtë koncesion janë përfshirë shumë zyrtarë të lartë”, shkruan Tabaku.
Sipas deputetes demokrate, në pranga duhet të ishin edhe kryeministri Rama dhe sekretari i Përgjithshëm i Kryeministrisë Ëngjëll Agaçi pasi kanë kaluar VKM për shpronësim e tokës në Këshillin e Ministrave.
