Grupi parlamentar i Partisë Demokratike do të zhvillojë një mbledhje të gjerë ditën e sotme në selinë blu, ku pjesëmarrës do të jenë të gjithë deputetë pavarësisht nëse mbështesin Berishën apo Bashën.
Mbledhja është njoftuar të zhvillohet në orën 13:00, ndërsa pikëpyetja e madhe është nëse do të jetë i pranishëm ish kreu i PD, Lulzim Basha, i cili refuzoi të shkonte në mbledhjen e fundit.
Sipas lajmeve në media, dy pritet të jenë temat e mbledhjes së sotme, njëra lidhet me procesin e bashkimit të partisë, ku mbështetësit e Berishës thonë që po ndodh dhe kjo tregohet edhe përmes mbylljes së procesit të zgjedhjeve për 80% të kryetarëve të grupseksioneve, gjë e cila do të lejojë edhe me kalimin në zgjedhjet për krerët e degëve të partisë.
Ndërkohë, një grup deputetësh të PD mendojnë se në fakt ky nuk është një proces ribashkimi, por vendimmarrje e njëanshme e mbështetësve të Berishës, ndërsa pika e dytë ka të bëjë me përplasjet e brendshme në PD.
