Ish kryeministrit Sali Berisha ka kujtuar kërkesën që presidenti ukrainas Volodymyr Zelensky i bëri kryeministrit Edi Rama për të mos lejuar ardhjen e turistëve rusë në vend, megjithëse përgjigja që mori nuk ishte pozitive.
Në konferencën për mediat, Berisha e konsideroi qëndrimin e Ramës si anti-NATO, ndërsa akuzoi kryeministrin se po lejon ardhjen e vrasësve dhe përdhunues në vendin tonë.
“Merr fund politika me 0 probleme nga jashtë. Askush tjetër, 0 probleme nuk do të thotë sherre po njohja e problemeve që ekzistojnë. Presidenti i Ukrainës, nderoi shqiptarët me një fjalim, ai pati vetëm një kërkesë, nuk kërkoi aeroplan dhe tanke, raketa as municione, kërkoi një gjë, mos lejoni turistët rusë të vijnë në brigjet tuaja. Rama flakë për flakë në mënyrë më të pacipë iu përgjigj se kjo nuk do të ndodhë. Unë jam këtu për ta dënuar këtë qëndrim, anti shqiptar, anti NATO. Pse duhen vrasësit dhe përdhunuesit rusë të vijnë në brigjet tona? Kush e ka këtë moral veç Edi Ramës. Pse u dashka Shqipëria të ngjasojë me qëndrime me Rusinë? Pse duhet t’i pranojmë që të vijnë dhe të shplodhen në brigjet tona. është akt i papërgjegjshëm. Cila është arsyeja?”, tha Berisha.
