Shefi i Organizimit në Partinë Demokratike, Klevis Balliu, është shprehur se kryebashkiaku Erion Veliaj, ka vjedhur nga taksa e infrastrukturës arsimore 50 milionë euro për 7 vite.
I ftuar në “Syri Tv”, Balliu tha se qytetarët nuk kanë pse paguajnë këtë taksë pasi është detyrim i bashkisë t’i japë drejtim arsimit.
“Veliaj është i zënë duke vjedhur qytetarët. Prej 7 vitesh qytetarët e Tiranës paguajnë taksën e infrastrukturës arsimore e cila në parim duhet të shërbente për ndërtimin e disa shkollave. Janë mbledhur 50 mln euro nga kjo taksë në 7 vite, me 50 milionë euro mund të bëheshin të paktën 50 shkolla, të paktën, e marrim 1 mln euro një shkollë. Llogarisni që 14 mln euro qytetarët i paguajnë koncesionarit të PPP-së që ka vendosur Veliaj në këtë taksim të shpikur prej tij. S’kanë pse ta paguajnë, është detyrim i bashkisë t’i japë drejtim arsimit. E gjeti këtë taksë si një mjet për të vjedhur.”-tha Balliu.
Balliu u ndal dhe te afera korruptive e inceneratorëve teksa u shpreh se plehrat janë në mes të rrugës në lagjet e Tiranës pasi inceneratorët nuk i gjen dot as INTERPOLI.
“Nuk ekzistojnë. Veliaj që thotë do djegim plehrat, plehrat janë nëpër rrugë. Në njësinë 7 janë në mes të rrugës kryesore. Në çdo lagje, koshat janë të papastruar se s’kanë ku i çojnë, s’ka inceneratorë, ndërkohë qytetarët paguajnë 80 mijë euro në ditë për inceneratorët. Paguhet për shërbime që nuk jepen.”, tha Balliu.
