Ka mbërritur mëngjesin e sotëm, me afro 16 orë vonesë, trageti “Bridge” i linjës Ankona-Durrës.
Të lodhur nga orët e gjata të qëndrimit në det të hapur, udhëtarët kanë zbritur dhe u takuan me familjarët dhe të afërmit e tyre që i prisnin në port.
Trageti i kompanisë “Adria Ferries” me 820 udhëtarë në bord, pësoi defekt në njërin prej dy motorëve të tij gjatë udhëtimit. Ai u nis nga porti i Ankonës të premten në mbrëmje dhe pas defektit, trageti e vazhdoi lundrimin drejt Durrësit me motorin tjetër, duke ulur ndjeshëm shpejtësinë e lëvizjes.
Gjatë orëve të gjata të vonesës, personeli i tragetit u ofroi asistencë udhëtarëve me ujë dhe ushqime.
Gjatë këtyre ditëve, fluksi i atyre që kthehen në atdhe për pushime është në rritje. Vetëm ditën e sotme me 5 tragete pritet të mbërrijnë 5.030 udhëtarë. Ky fluks ditor parashikohet të rritet pas orës 10:00 të darkës me ardhjen e 2 trageteve të tjera nga porti i Barit.
