Kryeministri Edi Rama ka dhënë një intervistë për medien britanike, Sky News ku ka komentuar debatin me Britaninë e Madhe për emigrantët shqiptarë që kalojnë Kanalin me gomone.
Rama tha se është ende në pritje të faljes nga qeveria e Mbretërisë së Bashkuar për komentet e ministres së Brendshme për shqiptarët, pasi kjo e fundit i konsideroi si “kriminelë që po pushtojnë Anglinë”.
Lexo edhe “Kriminelët shqiptarë”/ Retorika ndaj emigrantëve, Rama: Britania të ndalë diskriminimin
Sipas kryeministrit Rama, deklaratat e sekretares së Brendshme Britanike, janë bërë për qëllime elektorale.
“Në politikat e ditëve të sotme nganjëherë këto gjëra mund të ndodhin, por ajo që më shqetëson më shumë është se nuk kërkohet falje. Është një mënyrë e ekzagjeruar e të shprehurit. Kjo është ajo që më shqetëson. Kjo do të thotë se ka një kalkulim, ku ti vërtetë po flet për disa votues, që të dëgjojnë atë, pasi ti do votën e tyre”, u shpreh Rama.
Braverman pretendoi më herët se Shqipëria ishte një vend i sigurt, duke shtuar: “Shumë prej tyre pretendojnë se janë trafikuar si skllevër modernë…e vërteta është se shumë prej tyre nuk janë skllevër modernë dhe pretendimet e tyre se janë trafikuar janë gënjeshtra”.
Komentet e saj nxitën një rishikim të udhëzimit të Home Office të përdorur për të pranuar kërkesat për azil nga Shqipëria me shifrat që tregojnë se vetëm këtë vit rreth 12 mijë shqiptarë kanë arritur me gomone në Britani.
