Ish.kryeministri i Italisë, Massimo D’Alema mbajti një fjalim në Kongresine PS-së që po mbahet sot në Pallatin e Kongreseve. Ai kujtoi momentet që kanë bashkuar dy popujt fqinj duke e cilësuar një rrugëtim të përbashkët, një histori të përbashkët. Ai dha një mesazh për vlerat e socializmit duke u shprehur se “politika përbëhet nga shumë gjëra, nga reforma, debate nga negociata por një forcë e madhe socialiste nuk i harron vlerat e humanizmit të solidaritetit”.
“Ajo që na bashkon është një histori e gjatë por në këto 20 vitet e fundit, madje më shumë se 20 vjet e jona ka qenë historia e një miqësie të thellë dhe sigurisht e majta italiane e ka përjetuar marrëdhënien e saj me Shqipërinë me një frymë miqësie të madhe. Kemi bashkëndarë shpresa, kemi jetuar kriza dhe angazhimi i Italisë nuk ka munguar kurrë. Nga misioni Alba që u bë nga Romano Prodi deri në çastet e mëpasme. kemi fituar bashkë shumë beteja të vështira. Njëra,
kemi fituar betejën kundër trafikantëve të qenieve njerëzore dhe nëse në detin tonë Adriatik apo Jon nuk ndodh prej shumë vitesh ajo që ndodh në vende të Mesdheut është edhe sepse Shqipëria dhe Italia duke punuar së bashku e ndërprenë trafikun e qenieve njerëzore. Kemi qenë afër njeri-tjetrit edhe në çastet dramatike. Më kujtohet një feste Pashkësh shumë vite më parë që e kalova në Pikën Kufitare të Kukësit në mes të maleve dhe vinte një lumë i vërtetë njerëzish të dëshpëruar, të plagosur, të dëbuar nga toka e tyre, Kosova. Ne ishim aty për t’i pritur, për t’i mikpritur së bashku. Më erdhi ndërmend duke parë në TV refugjatët e dëshpëruar të grupuar në kufijtë me Greqinë, Maqedoninë, fëmijë të lënë në mes të baltës përballë një muri dhe më erdhën ndërmend ato pamje të largëta të atyre refugjatëve të shumë viteve më parë. Më lejoni të bëj një thirrje për të gjithë: Kemi një detyrim moral, nuk mund t’i dëbojmë ata njerëz të dëshpëruar dhe t’i çojmë sërish drejt luftërave. Duhet të gjejmë një zgjidhje dhe duhet ta bëjmë sëbashku. Kemi asistuar egoizmin e shumë vendeve. Kjo tragjedi tregon se sa Evropa ka nevojë për vendet e Ballkanit Perëndimor. Këto janë vlerat tona. Politika përbëhet nga debate, reforma, negociata por nëse një forcë socialiste harron vlerat njerëzore do të thotë se do të harrojë vetveten, këtë nuk mund t’ia lejojmë vetvetes. Le t’i bëjmë gjërat ku të fitojë solidariteti dhe të ndërtojmë së bashku një të ardhme të përbashkët”, tha nder te tjera D’Alema.
Europarlamentari i majtë Gianni Pitrella gjithashtu e përshëndeti kongresin sot në Tiranë duke u shprehur se “familja socialiste dhe progresiste sot në Europë dhe në Botë po përjeton një fazë vështirësish”. Edhe ai kembenguli tek sjellja ndaj refugjateve duke kerkuar solidaritet. “Ne jemi zgjidhja për refugjatët. Nuk jemi si e djathta europiane që pranon dhe të vrasë fëmijë refugjatë vetëm të mos i pranojë në BE e ti ndihmojë. Ne jemi ndryshe. Sfidat e mëdha socialistët i kanë në ADN e tyre”, tha ai
