Philipe Coutinho ka lënë Barcelonën dhe është prezantuar zyrtarisht si lojtari më i ri i Aston Villa, me formulë huazimi për 6 muaj, por me opsion blerjen e tij në fund të sezonit për 33 milion euro.
Ka qenë vetë klubi anglez ai i cili ka prezantuar 29-vjeçarin, ndërkohë e ka bërë të ditur për tifozët nëpërmjet një postimi në rrjetet sociale.
Coutinho do të mbajë veshur fanellën me numër 23, teksa për të do të jetë një rikthim në Premier League, ku më parë ka veshur fanellën e Liverpool përpara se të transferohej në Spanjë te Barcelona.
“Është kënaqësi të jem këtu, në këtë klub të madh. Kam biseduar me Steven Gerrard, më tregoi për ambiciet që ka dhe un mezi pres të zbres në fushë. E njoh Steven, kam luajtur me të dhe kam mësuar shumë prej tij. Kam admirim të madh për të”, ishin fjalët e para të Coutinho gjatë prezantimit.
Gjatë këtij sezoni me fanellën e katalanasve në La Liga, braziliani është aktivizuar gjithsej në 12 ndeshje nga ku ka mundur të realizojë dhe dy gola.
