Policia ka zbuluar “muzeun” në shtëpinë e Artan Koçia, ku u gjetën 4 mijë vepra arti që mendohet të kapin vlerën e 8 milionë euro. Shtëpia është zbuluar nga një çift policësh të Drejtorisë së Tiranës, ku u autorizuan nga prokuroria e Tiranës, për të kryer veprime me qëllim blerjen e një pikture tek shtetasi në hetim, Artan Koçiu.
Nga një bisedë të zhvilluar në një kafe për çmimin dhe origjinën e tyre diskutimi ka vijuar në banesë ku policët kanë parë dhe objektet që dyshohet se do të trafikoheshin. Pikërisht ky ka qenë moment kur efektivët kanë dokumentuar situatën e më pas kanë vazhduar me operacionin e sekuestrimit.
Kush është Artan Koçia?
Koleksionisti Artan Koçia, 61 vjeç, i arrestuar nga policia e Tiranës gjatë aksionit kundër vjedhjes dhe trafikimit të veprave të artit, nuk është një person i panjohur për policinë. Në vitin 2014 ai është dënuar me 1 vit e katër muaj heqje lirie, pikërisht për veprat penale për të cilat ka rënë në pranga edhe në aksionin e fundit.
Sipas informacioneve, 61-vjeçari, banues në rrugën “Ali Demi”, njihet si një mjeshtër i punimeve artistike të drurit dhe i restaurimit të objekteve të vjetra si mobiljet dekorative dhe veprat e artit.
Duke qenë se prej vitesh Artan Koçia merret me këtë aktivitet të prodhimit dhe restaurimit të objekteve artistike e dekorative të drurit, ai mban në banesën e tij sasi të mëdha nga këto materiale. Sipas burimeve të policisë, mësohet se 61-vjeçari restauron shpesh objekte të vjetra e të rralla me porosi të politikanëve dhe koleksionuesve të ndryshëm.
Pikërisht për shkak të sasisë së madhe të objekteve që mban në banesë, 61-vjeçari u arrestua edhe në vitin 2013. Vetëm pak ditë pasi policia kishte prangosur koleksionistin e njohur Gjergji Thimo dhe kishte reklamuar në media “arsenalin e rrallë” të objekteve që ishin sekuestruar, një qytetar telefonoi në policinë e Tiranës.
