Në kuadër të vizitës zyrtare që po mban në Gjermani, kryeministri Edi Rama po zhvillon një bashkëbisedim me gazetarët shqiptarë ku ndër të tjera ka komentuar dhe integrimin në BE dhe mundësinë e ndarjes nga Maqedonia e Veriut për hapjen e negociatave.
Rama tha para gazetarëve se i ka bërë me dije kancelarit gjerman se nëse Shqipëria nuk merr dritën jeshile për negociatat deri në qershor, atëherë do të kërkojë të ndahet nga Maqedonia e Veriut.
“Nuk e kam kërkuar këtë thjesht i kam bërë me dije kancelarit që ne kemi një qasje që deri në qershor në rast se ne do të bllokohemi për shkak të Bullgarisë. Ne i tregova për Këshillin kombëtar do të ndryshojmë qasjen duke folur me gjuhë tjetër për nevojën e Shqipërisë për tu ndarë nga Maqedonia. Kancelari e tha në bisedimet që është optimist për ndryshimin e kushteve të Bullgarisë, por unë nuk jam aq optimist shpresoj që kancelari të ketë të drejtë”, tha Rama.
Kujtojmë se ditën e djeshme Rama zhvilloi një sërë takimesh në Gjermani përfshirë dhe me kancelarin gjerman Olaf Scholz, ku ky i fundit ka vënë theksin tek nisma e Procesit të Berlinit duke injoruar nismën e “Open Balkan”, ndërsa tha se Gjermania mbështet integrimin e Shqipërisë në BE.
