Irani ka lëshuar një paralajmërim ndaj Izraelit dhe aleatëve të tij, duke kërcënuar se do të zgjeronte sulmet hakmarrëse nëse diplomatët ose misionet diplomatike iraniane sulmohen në Liban.
Një zyrtar i lartë iranian tha për agjencinë Tasnim se “Nëse regjimi sionist ndërmerr ndonjë veprim kundër zyrave diplomatike ose diplomatëve iranianë në Liban, masa të ngjashme do të merren në vende të tjera kundër qendrave dhe shtetasve të lidhur me regjimin sionist.”
Ky paralajmërim vjen ndërsa Izraeli ka urdhëruar evakuimin e banorëve të Libanit jugor, pas zgjerimit të operacioneve kundër Hezbollahut, i cili ditët e fundit ka sulmuar territoret izraelite me raketa dhe dronë në mbështetje të Iranit.
Ndërkohë, SHBA-të kanë mbyllur ambasadat në tre vende të Gjirit, duke paralajmëruar qytetarët amerikanë të largohen nga rajoni, ndërsa një sulm me dron goditi të martën ambientet e konsullatës amerikane në Dubai.
