Protesta e radhës së opozitës, që do të zhvillohet të Martën e javës së ardhshme duke nisur nga ora 17:00, do të shoqërohet me bllokim të rrugëve.
Një ditë më parë, gjatë një konference me gazetarë, kryetari i Partisë Demokratike njoftoi ditën e protestës së ardhshme kombëtare të opozitës.
-“Duke parë situatën, vendimet e gjykatës dhe në situatën ku ndodhet opozita, për këtë vit a do të ketë tjetër protestë kombëtare nga ana e PD dhe aleatëve të saj”, u pyet Berisha.
Në përgjigje, tha se protesta e radhës do të mbahet të Martën e 26 Nëntorit.
“Më datën 26 është protesta tjetër kombëtare, më e fuqishmja që ka njohur Shqipëria. Ndaj ftoj shqiptarët me datë 26, marshim në Tiranë. E gjithë Shqipëria në Tiranë. Ora do të njoftohet. Nuk ka tërheqje. Mosbindja civile është rruga e vetme e ndarjes nga kjo diktaturë”, tha Berisha.
Për protestën, ai foli edhe gjatë tubimit që u mbajt poshtë banesës së tij në mbrëmje. “Më datën 26 Shqipëria në Tiranë, marshim në Tiranë, fitore në Tiranë. Është radha jonë, është radha jonë, është radha jonë”, tha Berisha.
Këtë të Shtunë, shefi i organizimit në Partinë Demokratike Klevis Balliu njoftoi se protesta do të nisë nga ora 17:00 dhe gjatë saj do të bllokohen rrugë.
“Ditën e Martë në orën 17:00 Tirana do ti kthehet qytetareve. Kjo protestë do të sjellë kryeqytetin në duart e sovranit rrugët e korrupsionit do të bllokohen masivisht përballë Narkoqeverisë Rama”, shkroi ai në një postim në rrjetin social “FB”.
Një protestë me bllokim rrugësh, që opozita e ka cilësuar një nga format e mosbindjes civile, u zhvillua mbrëmjen e 29 Tetorit.
Opozita kërkon qeveri teknike para zgjedhjeve të ardhshme parlamentare që do të mbahen në një datë që pritet të përcaktohet mes 15 prillit dhe 15 majit. Për opozitën, qeveria teknike është një mekanizëm për garantimin e zgjedhjeve të lira, megjithatë kërkesa deri më tani nuk është marrë në konsideratë nga mazhoranca.
