Nga Alketa Ipeku
E dhimbshme ajo çka ndodhi me vogëlushen në Kavajë, por akoma më tragjike është ajo çka ndodh më pas.
I thyen ëndrrat një grup “çakenjsh të uritur”, ndërsa ju po i vrisni shpresën për të ecur përpara. Ju të gjithë po tregoheni më të etur kush e kush të marrë trofenë e ngjarjes.
Dikush thotë po e politizojnë, të tjerët janë lajmëtarët e kobit. Boll vutë duart tuaja “pis” mbi plagën e pambyllur të një vajze, e cila ende pa nisur jetën ia shkatërruan atë. Ju po mundoheni ta vrisni atë dhe familjen e saj.
Jam e bindur që tani, nëna e saj i ka sytë e shpirtin mbytur në lot, po i fsheh përballë të voglës së saj. Fsheh dhimbjen dhe urren. Kë? Cilët janë shkaktarët e vërtetë? Unë, ti dhe gjithë kjo shoqëri. Dhe ju politikanë që nuk zgjidhni gjë, të paktën heshtni! Heshtni ju që jeni nëna vajzash, mos jepni konferenca shtypi pa kuptim për të reklamuar veshjen e radhës, po shkoni pranë asaj nëne që po e vrisni me akullsinë e fjalëve tuaja dhe ngricën e shpirtit.
Ju flisni, se nuk e mendoni kurrë që e ardhmja e fëmijëve tuaj e shkollimi i tyre të jetë në këtë vend, po larg prej këtu në kolegje me emër, ku djemtë vijnë nga “dyer të mira e fisnike”. Ju drejtohem si nëna e dy vajzave, të cilat i solla në jetë, po i rris sikurse shumica e nënave me mund e sakrifica në këtë shoqëri me shumë probleme sociale, ekonomike e të tjera pa fund që përpiqem t’u mësoj më së pari vlerat njerëzore. Po mundohem t’i bind se jeta ka vështirësi, ka sfida po jam e pazonja t’u them se ka dhe makabritete të tilla.
Zot jepi forcë e durim asaj nëne e mbyllu gojën hijenave politike. Zot na jep durim e forcë për të mbrojtur vajzat tona.
Ato nesër do jenë nëna sikurse unë dhe ti.
