Pas ceremonisë së hapjes së kursit të oficerit të policisë kriminale, ka reaguar ish-deputeti Endrit Braimllari ku shprehet se kryeministri Edi Rama me udhëzimin e ministrit Sandër Lleshaj, kërkon të instalojë në vend juntën ushtarake.
Përmes një postimi në facebook, Braimllari shkruan se kjo lëvizje është e gabuar për faktin se me përgatitjen e ushtarake njihet arti i luftës dhe jo parandalimi dhe kapja e autorëve.
Postimi i plotë
Edi Rama me udhëzimin e Sandër Lleshit për të përfshirë efektivët e forcave speciale të ushtrisë në Policinë e Shtetit kërkon të instalojë në vend juntën ushtarake.
Edi Rama me këtë udhëzim mbyll rrugën për tu bërë pjesë e Policisë së Shtetit studentët e Akademisë së Sigurisë.
Forcat e Armatosura veprojnë në raste të përcaktuara qartë nga ligji 64/2014 neni 22 për “Përdorimin e forcave të armatosura gjatë gjendjes së jashtëzakonshme”
Përgatitja ushtarake njeh artin e luftës kurse përgatitja e efektivëve të policisë ka të bëjë me parandalimin, zbulimin dhe kapjen e autorëve.
Edi Rama me këtë veprim kërkon të fusë Ushtrinë në Policinë e Shtetit.
Frika nga protestat qytetare i ka hyrë në palcë sepse është i vetëdijshëm që revolta qytetare rëndon drejtpërdrejt mbi Edi Ramën, mbi hajdutërinë, korrupsionin, arrogancën dhe krimin e organizuar që ka suportin e Edi Ramës.
Nuk do ketë skemë ushtarake që do të ndalë revoltën qytetare.
Nesër më datë 5 Mars të gjithë bashkë në protestën qytetare tek sheshi para parlamentit të krimit dhe të hajdutërisë.
Krahas tij, kanë reaguar edhe deputetët e LSI-së, Floida Kërpaçi dhe Erisa Xhixho. Kërpaçi shkruan se argumentetet e Policisë së Shtetit janë qesharake dhe të turpshme dhe se e drejta për të protestuar është një e drejtë kushtetuese.
