Protestës kundër rritjes së çmimeve për produktet e shportës dhe naftës iu janë bashkuar edhe studentët e Korçës. Sipas burimeve, studentët e universitetit të Korçës ‘Fan S. Noli’ bojkotuan ditën e sotme mësimin, si shenjë revolte kundër rritjes së çmimeve.
Studentët kanë deklaruar se rritja e naftës i ka vënë në vështirësi ata dhe familjet të cilat janë kryesisht fermerë. Sipas tyre, rritja e çmimit ka ndikuar në rritjen e papaunësisë, ka rritur biletat e transporti dhe shtëpitë me qira.
“Arsyeja është tërësisht ekonomike dhe lidhet direkt me ne si studentë. E para, familjet tona janë kryesisht fermerë. Prodhimi bujqësor nuk u shit dhe për rrjedhojë ata nuk kanë mundësi të përballojnë shpenzimet tona në universitet. E dyta, papunësia. Ne si studente e kemi të pamundur gjetjen e një vendi pune dhe ndjekjen e universitetit paralelisht njësoj si moshatarët tonë në Evropë. E treta, rritja e çmimeve të ushqime dhe banesave me qira në raport me rrogat shumë të ulëta e bën të pamundur jetesën nëpër shtëpi me qira edhe në një qytet të vogël si Korça. E katërta, rritja e çmimit të naftës për rrjedhojë edhe e biletave të transportit e tejkalon mundësinë tonë për të përballuar gjithë këtë ngarkesë që kalon çdo limit të të ardhurave tona familjare dhe nuk diskutohen ato personale. E pesta kjo tendencë rritjeve e çmimeve na ka mbyllur çdo shpresë për një vazhdimësi të së ardhmes tonë në Shqipëri duke theksuar se shumë prej nesh nuk kishin mundësi të paguanin as tarifën e shkollimit. Kjo e fundit ju pasqyrua në formën e kërkesës rektoratit për shtyjnë e afatit të pagesës nga Këshilli Studentor”, thana studentët.
Ndër të tjera, ata kërkuan ndërhyrjen e menjëhershme të qeverisë nëpërmjet politikave të saj lehtësuese që vendet e rajonit tashmë i kanë marrë paraprakisht.
