Për plot nëntë muaj, Shoqata Vizion Gruaje, zbatoi në Bashkinë e Çorovodës një projekt që kishte në fokus problematikat me të cilat ndeshen përditë blegtorët, të cilët përbëjnë 80% të popullsisë në këtë bashki.
Projekti u financua me fonde të qeverisë zvicerane nga Lëviz Albania dhe kishte për qëllim parësor të monitoronte mundësitë reale që ka bashkia e zgjeruar e Çorovodës, pas reformës territoriale, për të ushtruar kompetencat që i jepLigji 139/2015 “Për Vetëqeverisjen Vendore” dhe konkretisht Neni 28 i cili sanksionon funksionet e bashkisë për zhvillimin ekonomik vendor.
Ekspertë të pushtetit vendor, blegtorisë dhe sigurisë ushqimore panë të gjitha mundësitë për të gjetur pika takimi midis politikave zhvillimore të blegtorisë dhe Turizmit, i cili po promovohet gjithnjë e më shumë. Mbi 20 mijë vizitorë mendohet se kanë vizituar Skraparin në katër vitet e fundit…Turizmi fetar, me pelegrinazhin e bektashinjve në muajin gusht në majën e Tomorrit është shndërruar në një tjetër resurs… Kanionet e Osumit, janë bërë atraksion i të huajve dhe shqiptarëve…
Turizmit këtu mund t’i vësh të gjitha epitetet-karakteristikë: kulturor, sportive, fetar e sidomos malor. Çka dëshmon madhështinë e vërtetë të Lirisë së lëvizjes, në të gjitha kahet…
Ata që shkojnë atyre anëve dhe ata që rrojnë atyre anëve…
Në gjykimin tonë blegtorët dhe blegtoria janë aseti më i madh e më i çmuar i këtyre maleve…
Po sa shpërblehet mundi i tyre? A kanë mundësi blegtorët ta ushtrojnë aktivitetin e tyre, i lashtë sa këto male, në ato përmasa që ka marrë turizmi, për shembull? Për fat të keq, jo.
Zhvillimi ekonomik i territorit është detyrë organike e pushtetit vendor. Nëse do të trajtoheshin në bazë të një plani strategjik dhe studimesh serioze nga ana e pushtetit vendor, blegtoria, blegtori dhe të gjitha problematikat që e shoqërojnë atë në jetën e përditëshme do të ishin zgjidhja e duhur për zhvillimin ekonomik të qytetarëve dhe tërë Bashkisë.
Qytetarët e Skraparit nuk mund të hyjnë në garë as me veten dhe as me zonat e tjera të vendit as me Detin që nuk e kanë, as me Peshkun, as me Kromin, as me Naftën. Ata dhe pushteti vendor mund të maksimalizojnë fitimet në turizmin dhe padyshim mund të maksimalizojnë prodhimin e mishit bio apo të nënprodukteve blegtorale.
