Reshjet e para të borës kanë zbardhur qytetin e Korçës pasditen e kësaj të marte. Sipas sinoptikanëve, temperaturat parashikohen të pësojnë ulje në ditët në vijim, ku pritet që të shkojnë deri në – 10 gradë celsius.
Sakaq në zonat rurale reshjet e borës kanë qenë prezente prej disa ditësh. Më konkretisht në fshatrat, Dardhë dhe Voskopjojë trashësia e dëborës arrin deri në 30 cm, duke u kthyer në atraksion për vendasit dhe turistët.
Përpos pamjes mbresëlënëse që lënë flokët e borës, temperaturat e ulëta kanë sjellë edhe problemet e para në fshatrat e thellë malorë, kryesisht në Njësitë Administrative Vithkuq, Lekas e Mokër.
Problemet vijnë edhe për shkak të rrjetit të amortizuar elektrik, ndërkohë që grupe nga OSSHE janë nisur për të bërë të mundur rregullimin e defekteve. Akset nacionale janë të hapura dhe pa probleme, ndërkohë që policia rrugore apelon për kujdes të shtuar ndaj drejtuesve të mjeteve dhe pajisjen me goma dimërore.
