Kryetari i PD-së, Sali Berisha i është rikthyer serish “foltoreve”. Gjatë një bashkëbisedimi me shqiptarët e Italisë, teksa shprehu mirënjohje për qeverinë Italiane, ish-kryeministri u ndal tek kontributi që kanë dhënë autoritetet e vendit fqinj në luftën kundër krimit.
Berisha solli rastin e ish-ministrit Saimir Tahiri, i cili aktualisht ndodhet në burg. Kreu i demokratëve u shpreh se nëse nuk do të ishte antimafia italiane sot Tahiri do të ishte mbi zv/kryeministrin.
Berisha u shpreh se “Italia jep një kontribut në luftën ndaj krimit të organizuar në të dy anët e Adriatikut. Antimafia italiane ka dhënë kontribute të jashtëzakonshme në betejën kundër mafias shqiptare”.
Berisha: Ju falënderoj për ardhjen tuaj sot në këtë foltore që unë e konsideroj të rëndësishme në një bashkëbisedim me ju, përfaqësues të shkëlqyer të emigracionit tonë. Foltore që zhvillohet në prag të një ngjarje të madhe në Itali, të rikthimit në pushtet të koalicionit të djathtë në Itali, rikthim që ka një rëndësi të madhe jo vetëm për Italinë, por edhe për rajonin dhe Evropën.
I shpreh mirënjohje të thellë qeverisë dhe kombit italian për mbështetjen miqësinë, solidaritetin e jashtëzakonshme që ka treguar për shqiptarët në këto dekadat e fundit, spektrit të tërë politik italian. Ndihmat e mëdha të këtij vendi mik kanë patur një rol shumë të rëndësishëm në ecjen e Shqipërisë në rrugën e tregut dhe demokracisë.
Nuk ka asnjë vend tjetër në të cilën emigracioni shqiptar të ketë arritur në një kohë të shkurtër, sukseset e mëdha që kanë arritur emigrantët në Itali.
Sot janë dhjetëra mijëra biznese të suksesshme, të vogla, të mesme e të mëdha që drejtohen nga shqiptarë. Janë dhjetëra e mijëra studentë që studiojnë në universitetet e Italisë.
Janë dhjetëra e mijëra shqiptare që investojnë në Shqipëri, pasi kanë krijuar disa kapitale.
Italia dhe Shqipëria kanë një lidhje miqësore të ngushtë, por ashtu sic thotë Adam Smith që pasuria përhapet, e vërteta është që nëse është përhapur diçka me shpejtësi në Shqipëri është biznesi italian dhe kultura italiane.
Italia jep një kontribut të madh në luftën kundër krimit. Antimafia italiane ka dhënë kontribute në betejën kundër mafies shqiptare. Po të mos ishte antimafia italiane, Saimir skafisti do të ishte mbi zv/kryeministër të paktën. Por ne jemi mirënjohës sepse ata bëjnë një betejë të vendosur kundër organizatave kriminale që dëmtojnë interesat shqiptare dhe italiane.
