Kreu demokrat Sali Berisha, i ka bërë një thirrje qytetarëve, që të reagojnë për të përmbysur regjimin e Edi Ramës. Në mitingun e rradhës, Berisha tha se në 1990, kohë kur nisi përmbysja e diktaturës, ishin qytetarët ata që reaguan dhe u përleshën dhëmbë për dhëmbë.
“Të ngrihemi dhe të nxjerrim këtë tokë të bekuar nga kthetrat e mafies së pamëshirshme. Të ngrihemi dhe të shpëtojmë shoqërinë shqiptare. Skënderbeu luftoi një pushtim të huaj, kurse ju po luftoni një pushtim të brendshëm më barbar.
Por ju bëj thirrje të gjithë atyre që na ndjekin. Mos prisni kurrë që t’i presë kush dorën me gërshërën e ligjit kryehajdutit të kombit, Edi Ramës.
Vetëm gërshëra e qytetarëve, vetëm ju, vetëm guximi juaj do i japë atij përgjigjen që meriton”, tha Berisha.
Ish-Kryeministri deklaroi se Skënderbeu, ky shqiptar, ky atdhetar, ky princ i lirisë, besoi tek shqiptarët, besoi tek trimëria dhe guximi i tyre, besoi te forca dhe fuqia e armëve të tyre dhe bëri beteja për 25 vite me radhe, të cilat bënë historinë e kohës, jehuan në të katër anët e planetit dhe Skënderbeu mori përjetësinë.
“Natyrisht ajo kohë ishte kohë perandorish, ishte kohë shekuj më parë, por Skënderbeu mbetet për çdo shqiptar, frymëzimi i tij.
Skënderbeu mbetet engjëlli që ruan Shqipërinë dhe shqiptarët në çdo kohë.
Skënderbeu i vetëm, por u ngrit dhe mundi një perandori. Forca e vërtetë e tij qëndronte në të vërtetat që mbronte. Në idealet për të cilat ai luftonte dhe luftoi.
Ndaj dhe për ne, ai është dhe mbetet frymëzuesi i çdo shqiptari, që beson të vërtetën, që është i vendosur të sakrifikojë për të.
Ju jeni të pathyeshëm sepse po mbroni të vërtetat e mëdha të kombit.
Skënderbeu luftoi një pushtim të huaj, kurse ju po luftoni një pushtim të brendshëm më barbar se sa çdo pushtim tjetër që kanë njohur shqiptarët.
Po luftoni një pushtim të brendshëm si pushteti i një kryehajduti që në 8 vite varfëroi, mjeroi duke vjedhur shqiptarët në mënyrë të pamëshirë dhe duke u pasuruar vetë me miliarda, me qeveritarët e tij, me suitën e tij.
Edi Rama me regjimin e tij në 8 vite rrokullisi shqiptarët në njerëzit më të keqpaguar në rajon.
Prej muajsh e muajsh është dërguar në parlamentin e krimit ligji për minimumin jetik në mënyrë që shqiptarët të mos vuajnë për vaktin e ushqimit. Por ky ligj refuzohet sepse Edi Rama e di se duke i varfëruar shqiptarët, ata ose nënshtrohen gjithnjë e më shumë, ose largohen nga vendi i tyre”, tha Berisha.
The post Berisha: Shqiptarë ngrihuni kundër regjimit të Ramës, mos prisni… appeared first on 27.
