Kryetari i Partisë Demokratike Sali Berisha bëri një sërë denoncimesh këtë të premte, në një konferencë për mediat nga selia blu. Ai publikoi edhe dy foto, që sipas tij, faktojnë konfliktin e interesit që kreu i Prokurorisë së Posaçme, Altin Dumani, ka me kryebashkiakun e Tiranës, Erion Veliaj.
“Kërcënime ndaj punonjësve të administratës për vota”
Berisha publikikoi mesazhin e një punonjësi të bashkisë së Fierit, për të cilin tha se është nën kërcënimin e vendit të punës, për shkak se nuk mbush dot formularin e PS-së për të afërm që jetojnë jashtë Shqipërisë, që të votojnë në zgjedhjet e vitit 2025.
Kryedemokrati u ka bërë thirrje degëve të PD-së që të organizojnë protesta para ambasadave të Shqipërisë, pasi këto institucione janë duke kryer veprimtari elektorale të ethshme për partinë në pushtet dhe Edi Ramën.
Situata në shkolla
Në konferencë, Berisha ka denoncuar edhe situatën sipas tij dramatike të sigurisë në shkolla. Berisha tha se narkoshteti ka futur krimin dhe drogën në klasa.
Ai denoncuar gjithashtu se shkollat dhe policia po fshehin ngjarjet e rënda që ndodhin nëpër shkolla.
Kontrollet e BKH te qendra e bashkëshortes së Veliajt
Lideri i opozitës foli sërish për kontrollin e BKH tek “Harabeli” i bashkëshortes së Veliajt. Ai u shpreh se “informova publikun se janë gjetur 230 mijë, natyrisht e ndryshoj shifrën që të mbroj sadopak burimin, por janë gjetur 220 mijë euro, por janë gjetur thasë me fatura 200 mijë, 300 mijë, 400 mijë, që vetëm Velica dhe Lalë Vjedhësi e dinë se çfarë janë ato”.
Në vijim të denoncimeve për aferat e kreut të bashkisë së Tiranës, kreu demokrat deklaroi para gazetarëve se “nuk ka ndodhur kurrë, përveçse në këtë qeveri, që familjarët e qeveritarëve të fitojnë tendera të lidhura me sektorin publik. Kurrë, asnjë!’
“Lidhja Dumani-Veliaj përmes kushëririt të gruas”
“Altin Dumani nuk i zbuloi kurrë lidhjet e tij dhe konfliktin flagrant të interesit që ka me Erion Veliajn nëpërmjet të dashurit kushëri, Klajdi Meçaj, kushëri i parë i gruas, drejtor në bashki”, u shpreh kreu demokrat gjatë konferencës në selinë e PD ku denoncoi sërish kreun e SPAK për konflikt interesi me Erion Veliajn.
“Të dashur qytetarë, një javë më parë unë publikova një status me dy foto në të cilën informova publikun se Altin Dumani banonte në shtëpinë e dajës së gruas së tij, Anastas Meçaj. Po nuk është vetëm kjo, dhe nuk janë vetëm misteret e asaj shtëpie të habitshme, se kjo shtëpi është përveç atyre tre shtëpive të tjera. Po, po! Kjo, thotë, është shtëpia e vjehrrit. Ky Anastasi është daja i bashkëshortes. Djali i dajës së bashkëshortes, Klajdi Meçaj, që unë i postova fotografinë, që është personi këtu me Edi Ramën, është drejtor në Bashkinë e Tiranës, ose ka qenë gjer së fundmi drejtor në Bashkinë e Tiranës, engjëlli mbrojtës i Erion Veliajt pranë Altin Dumanit”, tha Berisha për mediat.
“Çfarë është ky Klajdi? Klajdi është kushëriri i parë i bashkëshortes së Altin Dumanit. Mediat e qeverisë kërkonin me çdo kusht ta zhvlerësonin këtë fakt se kjo nuk është gjë, kjo nuk është e vërtetë. Tani BKH-ja digjitale çon fotografinë tjetër shkatërrimtare, përfundimtare. Ky është Dumani me bashkëshorten në ditëlindjen e vet, ku Klajdi poston këtë fotografi. Pra, vartësi i Erion Veliajt i uron burrit të kushërirës, Altinit, gëzuar 50-vjetorin e ditëlindjes së tij”, shtoi ai.
Në qoftë se më parë kemi akuzuar Krajën si një njeri që bllokonte hetimet për 3 vite me radhë për arsye se kishte nipin dhe mbesën punonjës në Bashkinë e Tiranës, të paktën ai, për faqe të zezë, tre javët e fundit u detyrua të japë dorëheqjen. Kurse Altin Dumani nuk i zbuloi kurrë lidhjet e tij dhe konfliktin flagrant të interesit që ka me Erion Veliajn nëpërmjet të dashurit kushëri, Klajdi Meçaj, kushëri i parë i gruas, drejtor në bashki. Ja ku është”, tha më tej Berisha.
