Kryeministri Edi Rama ndodhet në një vizitë zyrtare në SHBA, ku gjatë konferencës me gazetarët shqiptarë, ka komentuar ndër të tjera edhe shpalljen non grata të ish-kryeministrit Sali Berisha.
Rama tha nga SHBA se ky status është plotësisht meritë e Berishës dhe se nuk ka lidhje me faktorë të jashtëm. Rama u shpreh se të pretendosh një gjë të tillë do të thotë të akuzosh për korrupsion shtetin amerikan gjë të cilën ai e cilësoi absurde pasi përndryshe ky shtet do ishte në diktaturë.
“Shpallja non grata e Sali Berishës është meritë 100% e Sali Berishës. për të gjitha ato që ata e kanë shpallur non grata. Të thuash që qeveria e SHBA mund të influencohet nga faktorë të jashtëm për vendime të kësaj natyre do të thotë të akuzosh SHBA se janë shtet pa integritet dhe një qeveri që korruptohet për qëllime të të tretëve. Këto janë vendime që merren me procese të mirë përcaktuara dhe nuk kanë asnjë lidhje me faktorë të jashtëm. Nëse SHBA do të loboheshin kaq kollaj do ishin peng i diktaturave dhe regjimeve. Kjo nuk ka ndodhur dhe nuk ka si të ndodhë, SHBA kanë tjetër qasje dhe tjetër mënyrë funksionimi. Është e gjitha një farsë për të ardhur keq dhe akoma më për të ardhur keq janë ata që e besojnë. Çështjet e Sali Berishës janë të së shkuarës”, tha Rama.
Ndër të tjera, Rama gjithashtu foli shkurtimisht për disa nga çështjet me të cilat kishte biseduar me Sekretarin Amerikan të Shtetit, Antony Blinken.
