Ish-ambasadori i SHBA-ve në Shqipëri William Ryerson ka komentuar në një intervistë për Zërin e Amerikës edhe shpalljen “non grata” të ish-kryeministrit Sali Berisha nga DASH.
I pyetur për këtë çështje, duke iu përmendur fakti që në vitet ’90 Berisha gëzonte mbështetje të madhe nga SHBA, ambasadori i parë amerikan në Tiranë pas rivendosjes së marrëdhënieve, thotë se ndoshta para 25-30 vitesh nuk ishin përfshirë në korrupsion, por janë përfshirë më pas.
Ai e shikon vendimin e DASH si një sinjal kundër korrupsionit, pavarësisht se për kë bëhet fjalë.
“Ato që kanë ndodhur në Shqipëri janë inkurajuese, por edhe shumë zhgënjyese. Dikush më pyeti kohët e fundit se përse e bëri Sekretari Blinken këtë, përse jo një njoftim nga një prej zëdhënësve. Për mua ky është një sinjal kundër korrupsionit, jo vetëm për Shqipërinë, por se Uashingtoni do ta godasë korrupsionin sa herë ta shohë, pavarësisht se për kë bëhet fjalë. Ajo që ka rëndësi është çfarë bën tani ky, apo ai person, ky, apo ai entitet. Ndoshta para 25-30 vitesh nuk ishin përfshirë në korrupsion, por janë përfshirë më pas dhe prandaj tani po merr vëmendje kaq të lartë”, deklaroi Ryerson.
