Kreu demokrat Sali Berisha ka denoncuar sot rritjen e çmimeve dhe vendosjen e tyre përmes bordeve të transparencës. Berisha përsëriti akuzat se vetëm në tre muaj qytetarëve iu janë plaçkitur 340 milionë euro me çmimet që kanë diktuar.
“A do vijomë të qëndrojmë ne vetëm me deklarata në Facebook e dalje televizive para faktit tragjik të përdorimit të tiranisë së çmimeve kundër qytetarëve shqiptarë nga qeveria? Bordet janë komuniste, vetëm në tre muaj qytetarëve iu janë plaçkitur 340 milionë euro me çmimet që kanë diktuar. Po, qeveria merr 150 lekë më shumë për litër nafte TVSH. Ne kemi një terren të jashtëzakonshëm, një terren që pret vetëm veprimin tonë. Ajo që ndodh sot me shqiptarët nuk ndodh me asnjë komb tjetër”, tha Berisha.
Në takimin që po zhvillon me krerët e degëve në selinë blu, Berisha u shpreh se opozita do të nisë aksionin për të rrëzuar, sipas tij, regjimin e Edi Ramës.
