Shqiptari, Gjon Muharremaj, i cili përfaqësoi Zvicrën në Eurovision 2021, zuri vendin e tretë në edicionin e sivjetshëm, por ishte një nga emrat më të lakuar në rrjetet sociale e faqet rozë.
Në natën finale, 21-vjecari bëri dy krenare, gjë që shkaktoi reagime negative nga Serbia. Sipas mediave të tyre, ky gjest ishte provokim i qartë që duhej të çonte në skualifikim të këngëtarit shqiptar që përfaqësonte Zvicrën.
“Unë nuk e kuptoj shqetësimin”, është shprehur Gjon’s Tears në emisionin televiziv “Glanz & Gloria”. “Ajo që doja të tregoja ishte thjesht një falënderim për Shqipërinë. Shqiponja dy krenare është simboli i Shqipërisë. Ata gjithmonë kanë qëndruar pas meje. Gjithmonë kanë qenë krenar për mua. Unë jam shumë i lumtur për këtë dhe kjo ishte mënyra e falënderimit”, vazhdoi ai.
Theksojmë që familja e Gjonit jeton dhe vepron prej vitesh në Zvicër, por që me prejardhje janë nga Kosova. Gjon’s Tears ndërkohë ka marrë vlerësimin maksimal nga tetë vende pjesëmarrëse me 12 pikë.
