Anëtari i Këshillit Kombëtar të PD-së, Roland Bejko, ka sulmuar ish-kryeministrin Sali Berisha. Me anë të një postimi në rrjetet sociale, me ironi Bejko shkruan se të gjithë ata që nuk do i bashkohen Kuvendit të 11 Dhjetorit janë agjentë të Sorosit dhe të infiltruar të Ramës brenda PD-së. “Si e lexova komunikatën e djeshme për shtyp, dalë nga zyrat e agjipropit të “Faltores”, dhe një autokritikë e ndjerë nga ana ime.
Armiqtë e brendshëm, në bashkëpunim me ata të jashtëm, spiunë të agjenturave të huaja, veçanërisht atyre amerikane, (Soros), kanë dashur të eliminonin fizikisht jo vetëm Partinë tonë heroike, por edhe vetë Liderin Suprem- historik të saj. Por, më në fund ne i zbuluam ata, dhe më datë 11 dhjetor, gjyqi i popullit, do t’u japë dënimin e merituar. Ndaj urdhërohen të gjithë deputetët e grupit parlamentar që nuk janë të bindur ende se peng- kryetari i ka tradhtuar, t’i bashkohen sa më parë frontit demokratik të “Faltoreve” rreth liderit suprem sot, se përndryshe, nesër do të jetë vonë.
Ndaj, nëse nuk bëhen pjesë e krye-faltores më 11 dhjetor, ata do të konsiderohen puçistë, agjentë të Sorosit”, tha ai. Ndër të tjera, Bejko u shpreh, se ata të cilët nuk do të respektojnë rregullat e liderit suprem do të ngelen të vetëm.“Unë jam i bindur që bolshevikët e liderit suprem shumica, me që u pëlqen të vetëquhen të tillë, ashtu si Lenini para 104 viteve, do tu krijojnë kushte menshevikëve, pakicës, që nëpërmjet të drejtës për të pasur fraksione ta ushtrojnë veprimtarinë e tyre politike sipas rregullave të reja që do të bëjë vetë populli i revoltuar demokrat më 11 janar nën survejimin e syrit vigjilent të udhëheqësit suprem. Natyrisht, kush nuk do t’i respektojë këto rregulla demokratike që do jenë të hartuara nën frymën e parullës ç’do populli, bën partia, do ta gjejë veten në Siberinë e vetmisë”, shkruan ai.
