Pas reagimit të Departamenti i Shtetit, edhe zëdhënësja e BE-së, Maja Koçijançiç i është përgjigjur komenteve të presidentit Ilir Meta ndaj ambasadës së Shteteve të Bashkuara dhe diplomatëve amerikanë.
Sipas Koçijançiç, deklaratat dhe veprimet e përfaqësuesve të BE përfaqësojnë qëndrimet dhe pikëpamjet e BE-së, të cilët po punojnë për t’i mbështetur përpjekjet e Shqipërisë dhe për t’i çuar përpara reformat thelbësore.
Koçijançiç shton se beson tek bashkëpunimi me të gjithë aktorët në vend, me qëllim promovimin e partneritetit me Shqipërinë, ndërsa i cilëson të “papranueshme” deklaratat e Presidentit Ilir Meta mbi diplomatët në Tiranë
“Deklaratat e përfaqësuesve të autoriteteve shqiptare dhe partive politike që vënë në dyshim integritetin e bashkësisë diplomatike të Bashkimit Evropian në Tiranë për qëndrime të shprehura në cilësinë e tyre institucionale janë krejtësisht të papranueshme. Deklaratat dhe veprimet e përfaqësuesve të Bashkimit Evropian përfaqësojnë qëndrimet dhe pikëpamjet e BE-së. Ne përsërisim mbështetjen tonë të plotë për punën e shkëlqyer që Ambasadori i BE-së dhe Delegacioni i BE-së po bëjnë për ta sjellë vendin më pranë Bashkimit Evropian. Bashkimi Evropian, të gjithë përfaqësuesit e tij dhe vendet anëtare po punojnë për t’i mbështetur në mënyrë efektive përpjekjet e Shqipërisë për t’i çuar përpara reformat thelbësore në dobi të qytetarëve shqiptarë. Ne besojmë se respekti dhe bashkëpunimi është i garantuar nga të gjithë aktorët në vend, me qëllim promovimin e partneritetit tonë me Shqipërinë”, shprehet Maja Koçijançiç.
