Këngëtari Elgit Doda së fundmi ka publikuar një sërë këngësh, që kanë marrë pëlqimin maksimal nga audienca. Kënga e fundit titullohet “Fatal Love”, e cila u publikua në Youtube e shoqëruar me videoklip dhe bëri goxha zhurmë.
Si pjesë e triologjisë së publikuar në bashkëpunim me Donald Veshajn kënga u diskutua gjatë dhe rreth saj qarkulluan skenare të ndryshme.
Gjithashtu, në këtë këngë jo pak vëmendje mori edhe protagonistja e klipit. Ajo quhet Dona Kodra dhe është motra e Saimir Kodrës. Ditën e sotme e ftuar në një intervistë për emisionin “Ditë e Re”, Dona ka folur për herë të parë për bashkëpunimin me këngëtarin dhe vëllain e saj, gazetarin e njohur.
Dona u shpreh se kjo ishte hera e dytë, por e quajti të fundit që del në një videoklip. E pyetur se si ishte të luante në klip me një burrë të martuar si Elgiti, Dona është shprehur se ai është shumë modest, i mirë dhe punëtor.
“Ishte hera e dytë dhe e fundit. E para ishte me Young Zerkën. Bashkëpunimi me Elgitin ishte shumë i bukur. Nuk ishte e vështirë t’i qëndroja pranë Elgitit edhe pse është i martuar. Ma bëri shumë të thjesht. Një djalë shumë i mirë dhe punëtor.”
E sigurisht nuk mund tu shpëtonte pyetjeve rreth vëllait të saj për të cilin është shprehur se është shumë mbështetës. Teksa e përshkroi si një natyrë të rreptë Dona tha se me të moderatori është shumë i mirë.
“Saimiri është shumë mbështetës. Ne e kuptojmë njëri-tjetrin shumë mirë. Është vetë artist dhe nuk ka si të më kundërshtojë. Kemi diferencë të madhe moshe. Kam dhe një motër tjetër të madhe. Saimiri është një natyrë e rreptë me të tjerët, por me mua është një dashuri e vërtetë. Unë krenohem me atë, kam një mrekulli që ma ka falur Zoti, por nuk e përmend shpesh sepse kam identitetin tim. Përveçse më ka hapur dyer nuk më ka mbyllur asnjë derë deri tani.”
Së fundmi, ajo tha se ekrani është ëndrra e saj në sirtar dhe se do i pëlqente një emision i përditshëm. Por shtoi se aktualisht këtë ëndërr e ka lënë mënjanë dhe nuk është e fokusuar.
“E kam menduar të bëhem pjesë e ekranit dhe e kam vendosur si ëndërr në sirtar. Nuk më venitet si pasion por ndoshta nuk ka ardhur momenti i duhur. Do më pëlqente një emision mëngjesi, i përditshëm. Edhe pse gjumin e dashuroj.”
