Kryetari i Partisë Demokratike, Lulzim Basha, ndoshta për herë të parë në historinë politike të Shqipërisë apo dhe më gjerë, ka sulmuar në prani të militantëve grupin parlamentar të partisë së tij, pra përfaqësuesit politikë në Kuvend të PD.
Basha në fjalën e tij tha se fitorja e Kavajës erdhi nga çadra dhe një fitore të tillë opozita nuk kishte mundur ta arrinte në 4 vite dhe një fitore të tillë nuk kishte mundur ta arrinte kurrë grupi parlamentar i Partisë Demokratike.
Duke mbajtur në krah Ndriçim Kullën, i cili tre ditë më parë, mesa duket me porosi të Lulzim Bashës, sulmoi zërat ndryshe në PD, Basha çoi një mesazh të qartë drejt grupit parlamentar demokrat.
Kreu demokrat nuk e vlerëson punën e tyre, aktivitetin deri diku e quan të dështuar dhe ky nuk është rasti i parë që kreu demorkat bën këtë veprim. Që prej marrjes së frenave të PD, Basha ka qenë shpërfillës ndaj grupit parlamentar dhe duke mos vlerësuar aktivitetin e tyre.
Basha e shmangu grupin parlamentar, nuk e përfilli grupin parlamentar gjatë negociatave të reformës në drejtësi apo negociatave të tanishme për zgjidhjen e krizës politike.
