Kryeopozitari Lulzim Basha theksoi se qytetarët refuzojnë sot dhunën e Qeverisë së ardhur në pushtet me dhunë. “Ne do i përgjigjemi me fuqinë e bashkimit, pjesëmarrjes, vendosmërisë, shpresës që ka lindur dhe që nuk e shuan dot as shiu i bekuar i perendësisë dhe aq më pak dhuna barbare e Edi Ramës”, tha Basha.
Kreu i PD-së tha se dhuna shtetërore që po përjetojnë qytetarët është produkt i dhunës zgjedhore dhe kjo e fundit është ajo që po e mban Edi Ramën në pushtet. Basha u shpreh i bindur se opozita do të fitojë betejën për zgjedhje të lira dhe për Parlament legjitim.
“Dhuna shtetërore është produkt i dhunës zgjedhore. Dhuna zgjedhore është mënyra e vetem e Edi Ramës për të mbajtur pushtetin. Ne nuk jemi këtu për pushtet dhe për karrige, ato i dogjëm sepse jemi në krahun e qytetarëve kundër dhunës, krimit dhe Qeverisë së bërë njësh me krimin. Ne do ta fitojmë betejën për zgjedhje të lira, Parlament legjitim dhe Qeveri për qytetarët. Rruga jonë drejt Evropës mbetet e bllokuar sepse në Evropë nuk shkohet me zgjedhje të vjedhura, pandëshkueshmëri, drejtësi të kapur që mbron kriminelët”, u shpreh kryedemokrati.
Lulzim Basha kërkoi sërish nga Edi Rama që të largohet nga posti i kryeministrit dhe t’i hapë rrugë organizimit të zgjedhjeve të lira e të ndershme.
