“Opozita e bashkuar është gati për çdo hap për të drejtën e votës”, kështu ka deklaruar kreu i PD, Lulzim Basha në një dalje për mediat pas takimit me aleatët e PD.
“Kreu i shtetit mendon se 13 tetori është një mundësi për daljen nga kriza politike përmes zgjedhjeve të parakohshme parlamentare, zgjedhjeve lokale dhe zgjedhje të reja presidenciale që nënkupton ndryshime kushtetuese.
Duke vlerësuar maksimalisht qëndrimin e Presidentit dhe shqetësimin e tij, i kam bërë të qartë që Partia Demokratike dhe opozita e bashkuar janë në këtë betejë për interesin e njerëzve, që zgjedhjet e ardhshme siç deklaroi edhe OSBE/ODIHR, duhet të jenë për njerëzit dhe jo për Ymer Lalët dhe shokun e tyre, Bablokun e madh dhe oligarkët.
Opozita është e gatshme të ndërmarrë çdo hap për t’i garantuar shqiptarëve të drejtën e votës që është dhunuar përtej çdo përfytyrimi siç e pamë edhe më 30 qershor ku Edi Rama nuk i rezistoi dot tundimit për të vjedhur edhe në një proces ku kandidonte vetë, numëronte vetë dhe për të garantuar një qeveri përmes zgjedhjeve të lira dhe të ndershme që punon për njerëzit”, theksoi Basha.
Basha tha se qeveria i është zhytur pasurive të vendit për t’i grabitur. “Një nga mëkatet më të mëdha, fajet më të mëdha të kësaj bande që na qeveris, është që duke tërhequr opozitën në betejën parimore në luftën kundër krimit dhe drogës, ia ka dalë t’i sulet buxhetit të Shqipërisë, ta vjedhë dhe ta grabisë qytetarin e thjeshtë, pasuritë e këtij vendi dhe ta zhysë ekonominë në ditën e saj më të zezë në dy dekada. Ndaj, kemi diskutuar edhe për platformën ekonomike”, shtoi ai.
https://www.facebook.com/lulzimbasha.al/videos/2295255060564906/?notif_id=1563214744748807¬if_t=live_video_explicit
