I dërguari i Posaçëm i sapoemëruar i qeverisë gjermane për shtetet e Ballkanit Perëndimor, Manuel Sarrazin sapo ka mbërritur në Tiranë ku do të zhvillojë një sërë takimesh me zyrtarë të lartë.
Në axhendën e tij, ai ka parashikuar disa takime që nisin me kryeministrin Rama, por bie në sy fakti se Lulzim Basha nuk do të ketë një takim me përfaqësuesin e lartë, por në vend të tij do të marrë pjesë Enkelejd Alibeaj, një lëvizje kjo që ngjall reagimet për një dorëheqje të mundshme të Bashës.
Gjithashtu, për herë të parë që prej shpalljes non grata të ish-kryeministrit Berisha nga Departamenti Amerikan i Shtetit, një zyrtar i huaj takon një përfaqësues të Foltores, konkretisht Genc Pollon.
Axhenda e të dërguarit gjerman ka parashikuar orën 16:30 për takimin me Pollon dhe Alibeajn, por nuk dihet nëse do t’i takojë bashkë apo me takime të veçanta.
Ndërkohë në Tiranë ndodhet me kërkesë të Bashës politikani gjerman, Elmar Brok, i cili po tenton të luajë rolin e negociatorit mes palëve të së djathtës, për t’i mundësuar Bashës të paktën dhe një vit në krye të PD dhe siguruar një tjetër dështim spektakolar të kësaj force politike.
