Sekretari i Përgjithshëm i Partisë Demokratike, Gazmend Bardhi, zbuloi detaje të reja mbi kalendarin e opozitës për Reformën Zgjedhore.
I ftuar në emisionin “Kjo Javë” në News24, Bardhi deklaroi se është përcaktuar agjenda e të gjitha grupeve dhe nëngrupeve, që do të kryejnë takime të përditshme, derisa brenda muajit opozita të ketë gati të gjitha çështjet që do të duhet të trajtojë reforma zgjedhore.
“Kemi përcaktuar agjendën e të gjitha nëngrupeve të punës, kemi përcaktuar që do mblidhemi si grup pune çdo të hënë në orën 18:00 dhe nëngrupet mblidhen në ditë të ndryshme brenda javës dhe në fund të muajit të kemi mbaruar punën tonë si opozitë, që të parashtrojmë çështjet që do duhet të trajtojë reforma zgjedhore.
Pala që ka përgjegjësi më të madhe për krijimin e krizës, që është qeveria, duket se është e vendosur të mos pranojë faktin që Shqipëria është në krizë. Për herë të parë Parlamenti i një prej vendeve kuçe të BE, i bën thirrje të gjitha palëve politike të gjejnë zgjidhje urgjente të krizës politike, përndryshe thotë Bundestagu rruga e hapjes së negociatave do të vështirësohet dukshëm.
Opozita ka treguar vullnet për zgjidhjen e krizës, pala tjetër bën sikur nuk e kupton se ka ardhur momenti për të zgjidhur krizën. Ne si opozitë jemi të vendosur për të përmbushur çdo kusht për t’i hapur vendit dritën jeshile për negociatat, ndërsa pala tjetër tregon një vullnet për të mos e mundësuar këtë për shqiptarët”, tha Bardhi.
Basha tha për “news24” se nuk ka frikë të përballet me Ramën, a është kjo një formë nënkuptuese se PD kërkon zgjedhje dhe s’ka rëndësi kë ka përballë?
Ne e kemi thënë që s’kemi problem të përballemi me këdo, përfshi edhe Ramën. Ajo që kërkojmë është që Shqipërisë t’i garantohen zgjedhje të lira e të ndershme. Zgjedhjet e viteve të fundit kanë treguar se Rama nuk ka vullnet për të përmbushur atë që duhet të përmbushë çdo kryeministër në një proces zgjedhor. Nëse palët marrin pjesë në barazi në një proces zgjedhor, PD dhe koalicioni opozitar mund PS dhe padyshim edhe Edi Ramën. Pra, nuk është problem për ne Rama.
Zgjedhjet e ardhshme në pranverën e ardhshme ….
Zgjedhjet e parakohshme parlamentare dhe lokale në të njëjtën ditë sa më shpejt të jetë e mundur janë mundësia e vetme që jo vetëm vendi të dalë nga kriza, por t’u jepet mundësi edhe qytetarëve për një qeveri që punon për interesin e tyre. Detyra e opozitës është të mundësojë zgjedhje të lira e të ndershme. Nuk është problem koha kur mbahen zgjedhjet, por e rëndësishme është të jenë të ndershme e të lira.
A do të arrihen këto zgjedhje dhe kur?
Kjo është e vetmja mënyrë që Shqipëria të mos ketë krizë si kjo që ka aktualisht. Një qeverisje që nuk prodhohet nga vullneti i qytetarëve është kjo që kemi ne sot, e korruptuar, që s’ka në fokus interesin e shqiptarëve. Për ne themeli i zgjidhjes është garantimi pas 30 vitesh i zgjedhjeve të lira e të ndershme.
Çfarë prodhoi takimi me sekretarin e OSBE?
Opozita e bashkuar i shprehu atij gatishmëri për të dhënë kontribut për realizimin e reformës zgjedhore. Morëm angazhimin e tij se OSBE është e gatshme të ofrojë ekspertizë, ose të jetë ndërmjetësuese në dialogun mes palëve.
Artikulohen protestat, por s’ka një datë. A është në agjendën e PD caktimi i një date?
Është e qartë për çdo shqiptar që Rama nuk është përgjegjës vetëm për mos hapjen e negociatave, por është pengesa e vetme që mban peng Shqipërinë në rrugëtimin evropian. Opozita, PD, ka thirru protesta, dhe edhe në të ardhmen do thërrasë protesta, sa herë të jetë e nevojshme për të sensibilizuar shqiptarët e ndërkombëtarët mbi atë që ndodh në vend. Ende nuk ka një datë për protestat, për shkak se ne gjykojmë që duhet të përqendrojmë energjitë tona në përmbushjen e kushteve që Shqipëria të afrohet sa më parë me BE. Forumet mblidhen dhe do përcaktojnë se kur do duhet që opozita të thërrasë protestë kombëtare. Qytetarët shqiptarë janë në protestë të përditshme.
Kur qeveria thotë se opozita ka bërë gjithçka për të penguar negociatat, ju ndjeni përgjegjësi?
Rama është faktuar si një njeri që kapet duke gënjyer, kështu që kjo është një tjetër gënjeshtër. Opozita ka qenë dhe vazhdon të jetë e angazhuar tërësisht për të mundësuar hapjen e negociatave të Shqipërisë me BE, sepse e shohim si një monitorim nga afër i situatës në Shqipëri. I vetmi njeri që ka bërë gjithçka për mos hapjen e negociatave është Edi Rama.
