Në protestën që po zhvillojnë sot para Kuvendit, banorët e “5 Majit” kanë hedhur poshtë akuzat se ata kanë zaptuar vendin. Madje kanë akuzuar qeverinë se po iu vonon qëllimisht legalizimet në mënyrë që të gjejnë justifikim për t’iu prishur shtëpitë.
Ata thanë se iu kanë kërkuar deri në 10 mijë euro për legalizimet, ndërsa çdo gjë tjetër e bëjnë për propagandë. “Askush prej atyre nuk është zaptues, të gjithë kanë kontrata shitblerje, por Balluku nuk i njeh këto gjëra. Pse janë vonuar legalizimet? Sepse doni ryshfet në dorë, 5 apo 10 mijë euro. Dikush i ka pasur mundësitë, dikush jo. Po të kishin vendosur këta parlamentarët nuk do të kishte asnjë person përpara këtij parlamenti. Dhe ajo Spiropali që është deputetja e Paskuqanit…a ka ardhur t’ju takojë Spiropali”, tha një prej tyre. Ndërsa shprehen se nuk dorëzohen derisa të arrihet një marrëveshje e drejtë dhe transparente për ta.
