Banorët e Rrjollit në Velipojë sot i kanë bërë pritë që herët në mëngjes punonjësve të kompanisë “Gener 2” të botuesit Bashkim Ulaj, duke i bllokuar rrugën makinerive. Ulaj po ndërton në Rrjoll një resort luksoz ndërsa banorët prej ditësh protestojnë e përplasen me policinë me pretendimin se Bashkim Ulaj u ka grabitur pronën.
Efektivët e policisë kanë mbërritur menjëherë në zonën e Rrjollit rreth orës 08:30 duke bërë të mundur spostimin e banorëve dhe hapjen e rrugës për makineritë.
Policia ka shoqëruar në komisariat dhe shume persona, për shkak të rezistencës që ata kanë bërë. Mes tyre është dhe një grua, Luçiana Kokaj, e cila në çdo protestë ka ngritur zërin për të drejtat e banorëve të zonës.
Banorët janë mbledhur në qendër të fshatit ndërsa për mediat bëjnë të qartë se nuk do të tërhiqen nga mbrojtja e tokës së tyre ndërsa i drejtohen me thirrje kryeministrit Edi Rama dhe gjykatave për zgjidhje.
“Kemi shkuar në orën 6:30 për të mos lënë makineritë për të hyrë në pronat tona. Në orën 9 erdhën furgonat e na u turrën me skafandra. Pse nuk na ndihmojnë? Përse ndihmojnë hajdutët? Duam drejtësi. Nëse je duke i rënë në qafë, të futemi në burg. Pse nuk vjen ai të takohet me ne? Kujton ai se e merr tokën time falas? Deri në vdekje jo”, tha banori.
“Kemi dalë gjithë populli i Rrjollit për të ndaluar punimet. Pastaj ka ardhur gjithë policia e ka bërë aty shtetrrethim. Mblidhemi përditë se ne po na masakrojnë”, tha banori.
“I bëj thirrje kryeministri që prej shumë vitesh që e votojmë, ta marri parasysh situatën e Rrjollit, se po merr parasysh gjithë zonat e tjera, vetëm Rrjollin jo. Një terror, nuk pyesin për gra e fëmijë. Ato letra që çojmë nëpër gjykata, i bëjmë thirrje t’i shohin”, tha banori.
