Ashtu sikurse ishte lajmëruar në rrugën e Rinasit, shumë banorë janë mbledhur sot për të protestuar pas kaosit të shkaktuar një ditë më parë. Banorët e Rinasit paralajmëruan ditën e djeshme se do të ngriheshin sot në protestë dhe arsyeja e protestës qendron tek bërja e rrugës me një sens lëvizjeje, drejt aeroportit të Rinasit.
Dje ata i kanë dërguar një kërkesë-njoftim policisë së qytetit të Krujës të cilën e kanë lajmëruar për kohëzgjatjen e protestës. Sipas kërkesës, bërja e rrugës me një krah është problem për banorët, për shërbimet edhe më minimale. Së fundmi, në kërkesë ata kanë shkruajtur se mbyllja e rrugës i pengon që të shkojnë në varreza apo të dërgojnë fëmijët në shkollë.
Ky vendim ka penalizuar banorët e zonës së Rinasit. Një ditë më parë ata thanë se për disa metra furgonat e shkollave duhet të përshkojnë një rrugë të gjatë.
Për këtë arsye ata janë mbledhur sot për të protestuar ndërkohë në vendngjarje ka forca të shtuara të policisë.
